PLEBISCITO.EU | PNV. Press News Veneto

Co no stato veneto indipendente podaremo cavar via montagne de bizantinismi italiani e desmentegarse tuti i salti mortali burocratici che el sistema italia ne inpone. Pensemo solo al sistema eletorale. Par prexentarse a ste elesion par la prima volta, el PNV se gà preocupà de starghe rente a tuti i regolamenti de racolta firme. Tirar su 12mila firme in 7 province co tanto de autenticatori prexenti no xe roba da poco.
Ma no xe finìa chive. Dopo se gà da ndar ai ufici eletorali de tuti i comuni indove che risiede i sottoscritori a na lista, e farse dar i certificati eletorali par verificar che chi che ga firmà el gà dirito al voto. Dodexemila firme moltiplicà par na ventina de partiti vol dir 250mila nominativi da verificar, uno a uno, pai vari inpiegà comunali, e altretanti certificà eletorali da stanpar (na foresta). El xe on dixastro ecologico e anca on incubo pai pori statali che a ogni elesion ghe toca laorar anca el sabo e la domenega par far tute ste verifiche.
Sto volume de scartofie no ghe sta gnanca in te na valixa, e i delegà de partito i riva leteralmente co on careto par portar in tribunal tuta sta documentasion, che dopo altri inpiegà i gà da controlar par aprovar ste firme.
Par on partito come el PNV, ghe toca far tuto par benin parchè i ghe controla tuto co la lente a ingrandimento. Ma xe conprensibile se partitoni come el PDL no i se cura de star drio a sto labirinto burocratego, parchè tanto se calcheduni ghe dixe calcosa, i pol senpre canbiar le legi al volo. Eco parchè, capita de sentir de morti che firma pa’l PDL a Monselice, o moduli intieri de firme non autenticà (non vere firme) prexentà in Lonbardia. Pì patetico el caxo dela Lega a Beluno che i se prexenta in tribunal sensa el minimo de firme (no i saveva cuante ne serviva) e i torna dopo un’oreta co on sentenaro de firme in pì, autenticà e co tanto de certificà eletorali (na firma co certificà ogni 40 secondi…).
Ma lasemo stare el sistema italia. Eco come che sarà in te no stato veneto indipendente: firme digitali. No xe fantasiensa, parchè dexà ale università i docenti i registra i voti dei studenti co dele ciavete USB speciali. Le vale come na firma e le pol eser doparà solo da l’intestatario (tramite password, e programa inpostà sul PC de l’untente).
Co na firma digitale, no ocor gnanca aver n’autenticator prexente. No ocor ndar dal nodaro, e no ocor portarse ai bancheti fora al fredo on consilier comunale o provinciale. No ocor gnanca ndar a l’uficio eletorale de ogni comune e farse stanpar diexene de mejari de certificà eletorali. L’iscrision come eletore la xe inplicita nte la firma eletorale. Sta firma eletorale la va diretamente in tribunale, sparagnando mejari de ore lavorative de statali.
No se pol gnanca doparar firme false o de morti come che ga fato el PDL sto giro, parchè co na firma digitale te riva in automadego na ricevuta par email (e par SMS) de cosa che te ghè firmà. Se on tribunale vol verificar el pol benisimo domandar diretamente conferma ai singoli citadini che ga sotoscrito.
Masa senplice? No par gnanca vero. Ma semo talmente abituà a viver rento sta cheba taliana che gnanca se rendemo conto che vivemo ntel 21eximo secolo e ste chive le xe solusioni ala veneta che gavemo a portata de man. Nemo tórsele.

Filipo Dal Lago
PNV