PLEBISCITO.EU | PNV. Press News Veneto

Comemorasion del pensator federałista veneto

Ancuò (21/03, ndr) a gò partesipà a Trevixo, inte ła piasa omonima, ala comemorasion de Silvio Trentin (San Donà de Piave, 11 de novenbre 1885 – Monastier, 11 de marso 1944), un pensator federałista e inteletual veneto che el xe senpre sta ostegià dal’intelighentia italica.

Gera prexenti vari esponenti del mondo politico veneto, grasie al’inpegno del’amico Elio Franzin, promotor deła comemorasion e segretario del “Centro studi sui federalismi Silvio Trentin” (e fondator nei àni ’60 del MARV, el movimento autonomista regionalista veneto, che forse xe stada una dełe prime sciantixe deła rinascita del pensiero politico veneto). Dal segretario deła Lega Nord-Łiga Veneta Gobbo, al vecio capo deła Łiga Veneta Rocchetta, al’esponente del PD Bottacin, al consilier comunal de Trevixo Tocchetto a molti altri che de sicuro son drio dixmentegarme.

Dal me ponto de vista xe inbarasante come i politisi veneti fin ancuò noi gapie vałorixà come che se deve sto pensator veneto. Xe soło grasie al’instancabiłe opera de Franzin e de Gangemi che invese ancuò se gà podùo rendar memoria a sto esponente grando del nostro pensiero.

Cuel che gò notà nei vari esponenti politisi intervegnùi xe sta la curioxità che me gà parso sincera nel voler saverghine de pì su un nostro conasional veneto che xe riusìo a rexistar al tenpo e al tentativo tałian de scondarne el nostro valor. Spero che anca nei personagi pì distanti dal nostro pensiero stamatina se gapie fato spasio na picola fratura nel’inconsapevołesa de esar veneti.

L’opara de Silvio Trentin ła xe stada granda davero, in particolar modo pa’l periodo storico che ło gà visto protagonista. Ancuò se vede ben i segni del so genio, in particołar se vardemo ai Consorsi de Bonifica che xe stai na so intuision straordinaria ed exenpio scieto veneto del far par antonomaxia.

Par cuel che riguarda nel spesifico naltri indipendentisti veneti, da un ponto de vista połitico, ritegnemo fondamental ło studio e ła vałorixasion del’opera de Silvio Trentin, che gà antisipà a nostro modo de vedar la vixion federalista de Elazar e che pol esar un exenpio straordinario de cueła che podarà esar l’organixasion statal del Veneto Stato indipendente.

Chisà, forse soło el tenpo el podarà rendar merito a Trentin e ai tanti pensatori veneti che purtropo naltri veneti se dixmenteghemo magari anca de ver vuo.

L’indipendensa ne serve anca pa riscoprir el nostro straordinario vałor inteletual, che ancuò no riusimo ad apresar nel so straordinario vałor, par na sorta de conpleso de inferiorità e de sindrome de Stocolma verso l’ocupante tałian.

Gianluca Busato
Segretario PNV