PLEBISCITO.EU | PNV. Press News Veneto

Tólto da GaxetaVeneta

Gianluca Busato, segretario del PNV dala so fondasion el se gà dimeso. Ła Gaxeta ło gà intervistà in escluxiva.

GAXETA: Parcòsa se gàlo dimetesto?

BUSATO: Parchè, pa doparar un tèrmine caro ała Gaxeta, ghévo da anichilirme. Sensa de mi ała guida el PNV el gavarà pì forsa połitica.

GAXETA : On mùcio de xénte parò la gà paura che sensa de lu el PNV el se desfe.

BUSATO: I se sbalia. El PNV el xe cresésto e on mùcio. Ghe xe on mucio de persone che le pol ciaparghine ła guida połitica. Panto, Pizzati, Tessari, Ghiotto, Venturato, Chiavegato, soło par dirghine calchedòn.

GAXETA : E lu? Cosa faràlo dèso?

BUSATO : Mi a resto, ma soło par chistion tecneghe-organixative a ndo a pol esar difisiłe sostituirme. E pa i sujerimìnti, co calchedòn el ghe ne gavarà de bexogno. Ma sensa carghe polìteghe.

GAXETA : El PNV se oniràlo co el PdV?

BUSATO : De segùro sensa de mi el prosèso el sarà pì fasiłe, se ghe xe łe condision politeghe. Xe sta creada na comision apoxita del PNV ca la gà el conpito de studiar tìnpi e metodi insieme a st’altre forse połiteghe Venete.

GAXETA : Ca futuro prevèdelo pa l’indipendentixmo Veneto?

BUSATO : A ghe xe bexogno de figùre nove, a ghémo da far neto dei veci połiteghi nostaljeghi.

GAXETA: Debołese?

BUSATO : A ne serve un sistema de intelligence pì sofistegà.

GAXETA : E i schei? Sensa ganbe anca łe mejo idee łe gà vita curta.

BUSATO : Parché łe idee łe gapia ganbe a ghe vol vànti tùto łe idee e deso łe ghe xé. On problema ała volta. A xé drìo mòvarse on gràn intarese. Ste elesion regionałi łe xe stà on stage fondamental. Deso a se trata de rinforsàr el tuto, dòpo àni a xé drìo interesàrse na pàrte nòva del mondo inprenditorial Veneto.

GAXETA : Sa xei i raporti col mondo del venetixmo clàsego?

BUSATO: Deso chel mondo el xe inte la faxe del’inamoramento a xe inutiłe sercar de far ragionar on inamorà. Se ga da spetar ca i ciàpe na bota soi dìnti e ca ła ghe pase. Vanti de do àni dixmenteghemosełi. Asémo ca i ghe fasa el amor al novo inperador. Naltri serchemo altro par deso.

GAXETA : Racoanto tignila bota sta Italia?

BUSATO : A no savarìa dìr, ma ła nostra libartà no la dipende da łori. L’Argentina co ła xe ndà in bancarotta ła gà canbià 5 presidenti in do stimane. I scanpava dała Vila Roxada in elicòtaro. Ma dopo un fià de polvaron, cosa xelo canvià? Gnìnte. El fator economego el xe on catalixador fondamental, ma da soło no el basta, ghe vol l’alternativa połitega parecià. L’onego tròdo el xé chel lì’ ca savémo: Indipendensa. A ne serve crèsar, semo ancora masa débołi. Co on novo segretario gavaremo un novo slancio e podaremo diventar ancora pì forti.

GAXETA: E deso cosa farało?

BUSATO : A ghe ne xe da far on mùcio par ła nostra Indipendensa ca a gò soło l’inbaraso deła sielta!

GAXETA : A ne servirìa on redator!

BUSATO : Sènpre drìo schersàr vàltri.

GAXETA : Grasie de l’intarvista e augùri

BUSATO : grasia a vàltri, salùti.