PLEBISCITO.EU | PNV. Press News Veneto

Ciapè el vostro police e tegnilo in fora diretamente in fronte a valtri, frente la vostra facia. Deso sarè el ocio sanco. Verxilo e sarè el ocio dreto.

El vostro police pare esarse moso, anca se no gavì moso el vostro braso. La tecnologia 3D la fa texoro de sto efeto, sfrutando la abilità de el servelo de fonder do imagini in ona. Coei ociai ca gavì da metar su quando vardé coalcosa in 3-D i sta in pratega jutando el vostro servelo a interpretare le do imagini piate come se on ogeto ca el ga profondità.

Co el suceso de “Avatar”, na sbrancà de film 3-D, includendo “Alice intel paexe de le maraveje” e “How to Train Your Dragon” (Come adestrar el to drago), i xe drio lasar el segno in Hollywood. Martin Scorsese recentemente el ga anuncià ca el dirigerà on film 3-D verso la fine de st’àno. La Nintendo la ga anuncià piani par far na console da zugo in 3-D, la 3DS. Molte compagnie eletroneghe le ga modeli de televixion 3-D, portando la oportunità par sta elevasion de esperiensa vixiva inte la caxa apena le reti tv le scomisierà a transmetere pì programi 3-D. El canal 3-D de Comcast el ga transmeso “Tornei de Mastri del Golf” al inisio de sto mexe, e ESPN la ga pianifegà de lanciar na rete par sport in 3-D sto àno.

Ma i doturi dixe ca par i oci a costumarse de vedar in 3-D par ore ogni dì, ga coalke pericolo, includendo sintomi moderà come dixorientasion e, in rari caxi, atachi de sentimenti nervoxi.

La Samsung £D LED TV la vien fornia co sostansiali avixi de salute. I segnala ca serte imagini o luci lampegianti le pol indur atachi epiletici o ictus, e ca pol capitar “mal de moto, efeti postumi percetivi, dixorientasion, oci sforsà e diminuia stabilità de la postura” [traslasion da el englexe].

Doturi dixe ca la percentuale de zente ca la dovaria preocuparse de significativi efeti aversi la xe picinina, specialmente la posibilità de atachi. Pì comunemente la zente la podaria sperimentar vertigini o altri fastidi dopo ver vardà par on toco in 3-D.

Sintomi de nausea, mal de testa, e stracamento i pol vegner fora parché el 3-D el fa movar i oci inte on modo inaturale, dixe inte na e-mail el Dr. Lisa Park, profesor asistente clinico de el dipartimento de oftalmologia al New York University Langone Medical Center.

Eco come funsiona: El film 3-D prexenta do prospetive legermente difarenti de la istesa sena, soraimponendole ma separandole da on specifico grado.

I ociai 3-D i ga on filtro polarizador ca el separa ste do imagini, parmetendo ciascuna de eser vista da on ocio difarente. Coesto capita tanto rapidamente ca no se xe boni de vedar la tranxision, dixe Steven Nusinowitz, profesor asocià de oftalmologia al Jules Stain Eye Institute inte la Università de California, Los Angeles.

Intel servelo le do imagini le xe fuxe, creando la iluxion de la profondità, el dixe.

Quando vardè coalcosa vegner davanti valtri intel mondo reale, i vostri oci legermente i se incroxa on verso l’altro. Al isteso tempo, le lente le cambia forma in modo da tegner el ogeto a fuoco come el se move inte la vostra diresion, on proceso ciamà acomodasion. Ma quando valtri vardé le imagini so on schermo, i vostri oci i prova alinear le do imagini, ma no i “acomoda”, parché el ogeto no el xe efetivamente drio movarse verso de valtri.

“El filmà el xe drio dirve ‘Hey, a son drio movarme torno sta sena’, ma el vostro sistema vestibolar el xe drio dirve, ‘mi no sto movendome da nisuna parte’, e sta disconesion la farà sentir male talune persone” ne dixe Nusinowitz.

Par coeli co serte condision postàsoto, el ambiente artificial de el film 3-D sforsa el sistema oculare, cusì ca quando ve cavè fora i ociai pol eser dixorientante, dixe el Dr. Norman Saffra, diretor de oftalmologia al Maimonides Mediacal Center in New York.

Le persone i cui oci no i xe parfetamente alineà, o coeli ca i ga muscoli oculari deboli, no i sarà abili de vedar in 3-D, el dixe Saffra. El stabismo, na condision in cui i oci i ponta difarenti diresion, el pol eser on impedimento par vedar in 3-D. Talune persone co amblyopia, o ocio lilon, le pol anca mancar de la percesion de el efeto de profondità quando i porta i ociai 3-D.

Nusinowitz steso co el varda film 3-D ghe vien vertigini parché i so oci i ga gran difarenti erori rifrativi – lu el ga necesità de prescrision de forsa difarente par ogni lente dei ociai. Tutavia, baxà so la esperiensa co i pasienti, el dixe ca el crede de eser lu inte na minoransa.

“A voria dir ca el 80 parcento de la zente no la ga problemi”, el ne conferma.

Par via dei efeti de longo termine a vardar la televixion 3-D invese de la televixion regolare, nisun sa co securesa dato ca la xe masa na novità. Park el ga preocupasion par serie conseguense so i puteli ca i varda la televixion 3-D par longhi periodi de tempo — concludendo ca “on continuo stimolo abnormale el podaria posibilemente ver efeti de longo termine ca ancora no i xe stà studià”.

De Elizabeth Landau, CNN
Traslasion de Claudio G.  == note tecniche: 1:22 – EN/VEC – Vec score 12, En score 1 ==