PLEBISCITO.EU | PNV. Press News Veneto

Tolto da venetnet.wordpress.com

WASHINGTON –  La càmara de ‘l Congrèso USA la gà aprovà, el 29 april 2010 co’ 166 voti so 223, na lèxe par consentir a ‘l PuertoRico de decìdar el so futuro, daxendo a i 4 milioni de abitanti de ‘l Comonwealth la posibilità de esprìmare se restar soto a i Stati Unidi come ancò o deventar independenti.

Se la magioransa la xé favorévole de canbiare la situasione atual, el govèrno portorican el sarìa autorixà a efetuar na seconda votasion e la gente la podarìa sèliere tra cuatro opsion: sovranità, independensa, el stato de comonwealth atual o na asociasion co’ la sovranità de i Stati Unidi. E dòpo, anca el Congrèso USA el gavarìa da votare se el Puerto Rico el pol deventar on stato sovran.

Pedro Pierluisi, el raprexentante delegà da ‘l PuertoRico a la Càmara USA ma sensa dirito de voto e de paròla, el gà ricordà che l’ìxola la gà xà votà so sti tèmi par la pasà, ma el Congrèso USA non ‘l gà mai autorixà on procèso in cui i portoricani i podarà decìdar se restar on teritòrio USA o se deventar on stato indipendente.

“La strada americana la xé de consentir a le persone de votare, de esprìmarse e de dar mandato a i so raprexentanti elèti de raprexentarli conpletamente” – così ga parlà el goernador LUIS PUERTO RICO FORTUNOinte na conferensa stanpa insieme a Pedro Pierluisi. “Par 112 ani, no ghemo buo la posibilità de partecipare pienamente, inte on mòdo o inte ‘n altro, a le decixion che le revarda la nòstra vita cuotidiana”.
Puerto Rico el xé deventà on teritòrio de i Stati Uniti a la fine de la guèra ispano-americana e solo inte ‘l 1917 a i nati so l’ìxola ghe xé stà concèsa la citadinansa americana. Inte ‘l 1952 Puerto Rico el gà acuixìo el status de Repùblica. Ancò i portoricani no i paga l’inpòsta federal so ‘l rèdito ma i sèrve inte ‘l exèrcito american pur no podendo votar a le elesion americane.

Par la crònaca, inte ‘l ùltimo referendum nesuna de le opsion propòste la gà otegnùo pì de ‘l 50 par cento de i voti, pì precixamente l’opsion par restar on stato sotomeso a i USA la gà otegnù el 46,5 par sento, invese l’independensa solo el 2,5 par cento.
Adèso el dixegno de lèxe el pasa al Senato e spetemo védar i rixultati.