PLEBISCITO.EU | PNV. Press News Veneto

Poki i sa come ke realmente xe cascada l’Unione Sovietica. Tanti i pensa ke sipia stada ła crixi economica, altri crede ke sia sta ła połitica mericana nel periodo de Reagan a metar in crixi el gigante comunista, altri fa ancora altre ipotesi.
In realtà, a un serto ponto sto regime el xe come croła su sé steso. A ben vardar, cueło ke xe avegnùo xe ke rivai a un serto ponto ła caena de comando gà scumisià a no funsionar pì. I burocrati, i alti dirigenti, i funsionari de stato e tuto l’imenso aparato publico sovietico se gà come amutinà di fronte ai so leader połitici e sora de tuti proprio a chel Gorbaciov che xe restà de saso rento ła sała dei botoni, ma coi cołegamenti saltai col resto deła machena statal, che, no stemo dixmentegarse, ła gera na machena straordinaria, al ponto de dividarse l’influensa sul’intiero pianeta coi Stati Uniti.
Ma parké xe suceso? A un serto ponto se gà propagà na specie de virus suła rete statal sovietica.
I funsionari, i dirigenti publici a pì livełi, ke fin ad ałora i godea de privilegi inpensabiłi co altri sistemi, i se gà rexo conto ke el comunixmo no ghe convegnèa pì. Ke i podeva guadagnar de pì co altri sistemi, col capitałixmo. E ke łori stesi i gera neła condision de diventar i novi capitałisti co un novo regime połitico.
El paso a chel ponto el xe sta breve e gnisun gà podùo fermarlo. Atraverso alcune faxi de tranxision se xe rivai al sistema połitico che xe in piè ancora ancuò in Rusia co Putin, el leader de sta nova clase de funsionari ex comunisti. Oviamente nel pasagio ła Rusia gà perso toki del so inpero ke xè riuso a libararse creando novi stati (i Paexi Baltici, łe nove republike axiatike e caucaxike, l’Ucraina etc).
Se vardemo ben ła situasion tałiana no ła xe tanto diversa ancuò.
I anuncia na “manovrina” finansiaria de agiustamento de 25 miliardi de euro ke in realtà ła xe na bota misidial, se pensemo ke ła xe pì deła metà deła pì grosa manovra finansiaria del dopoguera. Ła difarensa sostansial coła manovra del ’92, stavolta xe ke no ghe xe pì sangue da ciuciar ałe inprexe, a cauxa de na crixi economica ke łe sta copando pexo de na epidemia de peste bubonica.
Deso ła ghe toca scumisiar a magnar tochi deła bestia publica, del stato pì costoxo del mondo osidental. Stavolta l’inprexa par l’Italia ła xe dura, un mucio dura.
Insoma, a el mostro statal tałian ła ghe toca magnarse da soło: no savemo sel tacarà dała coa (łe pension dei statałi par exenpio), opur da na sata (ła clase dei insegnanti, par dirghine n’altra), opur dal stomago (i medisi) o dal fegato (i infermieri). De sicuro i starà ben tenti a no tocar el sistema nervoxo (połisia e carabinieri), parkè senò i va in parałixi imediata, ma anca cusì, cołe prime mose el mostro el tacerà ver problemi de autocontroło. Eco spiegà parké stavolta i politici i gà vosùo dar un segnal (ridicoło) al mostro ke anca łori i xe drio far sacrifisi tajandose cualche 100 euro de privilegi. Insoma, i se gà tacà un ceroto in fronte pa giustificar el tajo dea coa e de tochi de sata, ma i efeti i podarìa esar asołutamente inprevedibiłi e cuesto scumisiarìa a canbiar łe carte in toła.

Un mesagio vołemo lanciargheło proprio ai funsionari publici del Veneto: nel Veneto indipendente anca łe funsion publike łe sarìa degne de un stato sivil e łori de sicuro i starà mejo su un stato ke pol vantar anca na tradision de eficiensa deła machena statal rispeto a cueło ke ghe tocarìa continuar a patir soto el taco del mostro tałian.

Ndemo vanti sensa paura verso el nostro destin, ke se ciama indipendensa. I nostri avversari i xe drio nar rento na faxe in cui i gà da ver paura de łori stesi e noi gavarà tenpo da dedicar a naltri.

Gianluca Busato
PNV Trevixo