PLEBISCITO.EU | PNV. Press News Veneto

Ieri go porta’ i boce vedar Iron Man 2, on film de asion co tanti sciochi e sgiantisi ma co de sotofondo na morale miga tanto superficiale. I supereroi dei fumeti mericani de solito i xe dele exagerasion de vere problematiche sociali. L’Omo Ragno, par exenpio, el xe la version fantaxioxa del teenager, co tuti i so problemi, e i so nemighi i personifega el mondo adulto co cui l’adolesente el ga da scontrarse nte la so vita cuotidiana. Iron Man, invese, raprexenta l’inprenditor.
Sto Omo de Fero no’l ga mia superpoteri dala nasita o dovui al caxo. Lu el se ga goadagna’ tuto grasie al so ingegno e laoro, e la fonte dei so superpoteri a xe na risorsa de energia pi potente del chela nucleare. Lu la ga’ descoverta trapelando de continuo, e che ghe permete de far nar vanti la so armatura. Iron Man par cuesto el xe on omo de suceso, e el xe anca tanto sbrufon, che se fa vedar belo ale fiere, che va veloce co le machine da corsa, e che se inbriaga ale feste. Ma alora chi xeli i so nemighi?
N’antagonista del nostro inprenditor a xe el stato. Ntel film se vede l’eroe ciama’ a raporto dal senato merican, che ghe rinprovera che la so descoverta la ga da deventar de dominio publico (controla’ dalo stato) par via dela sicuresa nasional, par difendarse da altri stati, e bla, bla, bla. Iron Man, no podendo svelar el so segreto, serca de spiegarghe ai senatori che la so invension e lu steso i xe on tut’uno, e che no pol miga separarse. In alternativa ghe tocaria a lu ofrirse ala merce’ del stato, ma che cuesta la saria sciavitu’, e donca la so risposta la xe no. Pi tardi se vedara’ che el stato el riese robarghe la tenologia insteso, ma el fine no’l xera el bene comune, ma i interesi de pochi, fra cui on so conpetitor domestego co manco abilita’ creative, ma pi conesioni co politeganti.
El secondo antagonista a xe lu steso. La vera ragion par cui Iron Man ghe dixe de no al stato a xe che par davero lu e la so tenologia i xe on tut’uno. El so segreto xe che el tien sta fonte de energia (al palladio) al posto del core (par via de on incidente a xera drio perdar el cor, e la so motivasion creativa la xera spinta da on istinto de soravivensa), e no pol farghine a meno par na cuestion vitale. Ma come el so prodoto el fa parte del so core (analogia de l’inamoramento inprenditorial col proprio laoro), sta energia al palladio el xe drio avelenarlo lentamente. La so invension a xe drio coparlo lentamente. Lu xe drio sercar na fonte alternativa, ma ghe manca el spirito inventivo parche’ el se ga adagia’ ntel so suceso.
El terso antagonista el xe el conpetitor foresto che ghe copia la tenologia. Ntel film el cativo el xe on fixico ruso de genialita’ ala pari de l’eroe. Pi che co la Rusia, na mejo analogia la saria sta co la Cina che pian pianelo a xe drio copiar i prodoti dei nostri inprenditori, faxendo tuto co pi ojo de gunbio, a manco costo, anche se (come ntel film) la cualita’ no xe mejo de l’originale. Come ntel mondo inprenditorial, el conpetitor foresto el vol proprio copar Iron Man, cavarlo fora dal marca’.
Eco che el nostro Omo de Fero el xe da novo spinto da l’istinto de sopravivensa: la so vecia tenologia el xe drio sofegarlo, e deso el ga anca na conpetision foresta che vol farlo fora. In te on momento de profonda crixi Iron Man cata fora on vecio filma’ de so popa’ (l’inprenditor de prima generasion) e cusi’ el cata l’ispirasion da na drita intertenporal lasa’ da so pare. L’unica maniera de narghe fora a xe de inovarse. Solo co na tenologia superior el pol saraviver e bater la conpetision e el so steso avelenamento. No existe mejo elemento del palladio e par cuesto el ga da nar oltre el posibile, e inventarse on novo elemento e far l’inposibile.
Solo co l’inovasion, sbregando xo nove frontiere, l’inprenditor riese a tegner bota, darghe na man de pache ala conpetision foresta, destrigarse dala medicrita’ de parasiti statali, e dixintosicarse da l’oprimente vecia ativita’.