Robin Hood

Sto weekend so nda’ vedarme Robin Hood (sta volta sensa i boce). El film vol eser on prologo ala legenda inglexe del bandito che roba ai richi par dar ai poareti. Dato che se trata de on personagio legendario, el film a lo dopara par contarne l’epixodio storico del momento: la nasita dela Magna Carta.

Robin Longstride (Pasolongo) el xe on arcere de ritorno dala tersa corciata co Ricardo Cor de Lion. El Re Ricardo el more infrisa’ in te na bataja in Francia, lasando el trono a so fradelo el prinsipe Xuane. Co Re Ricardo more anca on nobile che in fin de vita ghe domanda a Robin de riportar la so spada a so popa’, el vecio conte de Nottingham. Su la spada ghe xe na scrita: “Rise and rise again, until the Lambs become Lions” (Lévate e lévate da novo, fin che i agnèi no i diventa Lioni). Riva’ a Nottingham el vecio conte ghe domanda de inpersonar so fiolo (par ver on erede), e Robin el se cata a difender la so nova contea da la violenta tasasion del novo Re Xuane verso tute le contee inglexi.

Lexenda a parte, xe on fato storico che el Re Xuane finansiava la so eterna bataja contro la Francia disangoando i baroni del Nord. Sti baroni (fra cui Robin Hood), i se ga rivolta’ forsando Re Xuane a tratar par firmar sto documento, la Magna Carta, che ghe dase diriti ai conti. Come ntel film ala fine Xuane no firma (e difati sara’ so fiolo Enrico II a firmarla), ma xe interesante vedar come che la legenda de Robin Hood la vien adata’ ala storia. El rico prepotente a xe senpre Re Xuane, ma i poareti che se rivolta e che Robin Hood difende i xe i conti de l’Inghiltera setentrional.

I vien bastona’ e schisa’ par tuto el film, ma la perseveransa de Robin Hood de batarse par la giusta cauxa la vien riasunta so la so spada: “Lévate e lévate da novo, fin che i agnèi no i deventa Lioni”). A xe on mesagio pi potente de dir de tegner bota, de no molar, de tegner duro. Vol dir che anca se i xe tuti agnèi, sti inglexi (popolo e nobili) che no i xe boni de levarse contro na ingiustisia e che i paga e taxe, no sta molare, va vanti a testa basa, fin che no i deventa Lioni. In Inghiltera a xe suceso. I baroni i xe sta boni de far l’inposibile: inpor la Magna Carta a Re Xuane, on conceto inpensabile pa’l tenpo, che a tuti i efeti li rendeva omeni libari.

Morale de la favola: no stemo demoralixarse se se sentimo circondà da agnèi, parché gavemo da martelar fin che i deventa Lioni.

Lodovico Pizzati
Presidente – PNV

incorporato da Embedded Video

YouTube Direkt

If you liked my post, feel free to subscribe to my rss feeds

Post meta

This entry was written by lodovicopizzati and posted on Maggio 16, 2010 at 11:43 pm and filed under temi veneti. Bookmark the permalink. Follow any comments here with the RSS feed for this post. Both comments and trackbacks are currently closed.

Share with others