PLEBISCITO.EU | PNV. Press News Veneto

Esar veneti vol dir no mołar mai, catar senpre la forsa e ła voja de nar vanti. Naltri a semo come łe formighe, no se incontentemo de esar mantegnùi. A ghemo na energia e na voja de libartà che xe straordinarie. No xe da tuti.

Pensa che anca se semo soto el taco del stato deła mafia, na roba inprexentabiłe e da vergognarse a esarghine parte, a ghemo anca el corajo de difenderlo pì de chealtri, sensa rendarse conto che ła nostra vera Patria ła se ciama Venetia. E che Patria! E che storia! E che cultura!

Mi ghe vojo ben ai olandexi, ai todeschi, ai striaci: al steso modo a ghe vojo ben ai miłanexi, ai napołetani e ai romani. Ma noi xe me fradei. I me fradei i xe soło che i veneti.

Naltri a semo un Popoło grando, un Popoło vero. Se fusimo indipendenti, se podesimo dimostrar el nostro vałor vero anca come stato, podarisimo dar na man a far ndar mejo anca tuto el mondo, a scumisiar da st’altri Popołi deła penixoła, opresi come naltri da un stato oribiłe, in man ała mafia. Un stato che a volte el se prexenta cołe fatese oribiłi de cualche veneto snaturà. Come chel Brancher, de cui no podemo de sicuro esar fieri.

Pensemo ałora a cuando che ghemo dato na bota de splendor a tuta Europa. I ło ciama “Rinascimento italiano”, ma el gera el Rinasimento Veneto, Toscan, Napołetan, Siculo. Co che gerimo indipendenti e responsabiłi a ghemo dato el mejo de naltri. E ło steso i gà fato i altri Popołi deła penixoła.

El stato Italia el xe un morto che camina. Un stato ndoe prevale l’odio. Se creemo ła Venetia indipendente, ła Sicilia indipendente, ła Sardigna indipendente, ła Toscana indipendente, i sarà stati ndoe che vinsarà l’amor.
Par difisiłe, ma xe ła roba pì fasiłe del mondo. Basta che desidemo de esar responsabiłi. De vołer esar libari. E niente e gnisun ne pol fermar.

Łori i pol soło sercar de contarne bałe. Bałe pa dir che co l’indipendensa saremo pì poareti. E no xe vero, parché co l’indipendensa saremo el stato pì fiorente d’Europa, el primo pa inovasion e fermento cultural. Ara łe Fiandre, i ghe sta rivando. Epur el partito indipendentista che gà vinto łe elesion el xe nato soło che inte’l 2001. A vutu che naltri veneti semo de manco dei fiaminghi? A no penso proprio! Ara i scosexi. I gà un primo ministro indipendentista e i sta costruendose el futuro de novo stato indipendente deła Scosia. E sì che noi gà mia ła nostra forsa economica! Ara i catałani, anca łori i sta ndando verso ła costrusion deła Catalunya libara ndoe che tuti i parla catałan. Epur 30 àni fa i ło parlava manco in proporsion a cuanto naltri parlemo in veneto!

Insoma, a podemo girarse ndoe che vołemo, ma vedemo soło che speci de cuanto che se sta ben come stato indipendente e cuanto che stemo mal soto el taco talian. Cosa spetemo, ałora?

Cosa spetemo a iscrivarse suìto al Partito Nasional Veneto, a darghe forsa ała batałia połitica pa ła nostra indipendensa?
Basta che gheła mołemo de credar ałe bałe dei so giornai e dełe so tełevixion, pagae coi nostri schei pa tegnerne ignoranti de cuanto che semo forti, naltri veneti.

Mi a son fiero de esar veneto! E ti?

Gianluca Busato
PNV Trevixo