PLEBISCITO.EU | PNV. Press News Veneto

Ieri sera a son ndà a vedàr Heman Medrano che’l se ga exibio a le Golosangeles, cioè el me quartier de Verona, intel contesto de Golosine 37136, cioè la festa de le Golosine. No l’è mia roba de tuti i giorni ndar a vedàr un concerto de un mostro sacro (no dai, no l’è mia cusita bruto come che’l dixe lu) del rap e dato che mi a son cresùo co l’Hip Hop no me so fato mia mancar l’ocaxìon. Ghe son ndà anca parché, nonostante el me xovane aspeto da fresco buteleto, a son del ’79 e par mi Medrano l’è ancora Uno del duo Uno & Dj Shocca; boia can che vecioto che son.

Me spiaxe che no ghe sipia stà pì gente parché el tipo l’è un fuoriclase e mi lo amo dal profondo del cor. Certo, no son mia d’acordo co tuto chel che’l dixe nei so testi. Par exenpio mi so strafavorevole ai OGM (e a la bataja de Futuragra par la libara coltivasìon dei canpi privà) ma va beh, anca rento al Pnv gavemo idee difarenti dato che semo un partito plurale e l’è senpre bona roba scoltàr anca l’altra canpana. De drio la so maschera clownesca, Medrano l’è na testa intelijente e pensante e tra na canson e l’altra te infila discorseti che i’è tuto fuorché banali. Par exenpio el ga parlà de la UE che vol livelarne tuti conpagni e che gavemo da dir no a sta omologasion. Tenti però: el so discorso (fà el mio) no l’è de sararse a ricio ma fradelansa intel respeto par le diversità. Herman Medrano probabilmente no l’è mia indipendentista e la nasita de un stato veneto indipendente no’l rientra mia intel so orixonte, magari el pensa che’l sipia na roba stranba che no la ga senso. Però par mi la concluxion de so discorso l’è questo, almanco a mi me vien naturale rivàr a sta concluxion: un stato veneto indipendente e sararse a ricio i’è do robe che no i’è colegà.

Mi ghe digo grasie a Medrano parché no se vergogna mia de doparàr el veneto (che lu però el ciama dialeto, e mi no so mia d’acordo) e el rende pop la nostra lengua. Vardè che no l’è mia na robeta da poco. A ne servirìa diexemila fà Medrano par darghe la susta al veneto e farghe ver appeal anca par i pì xovani. Le do cansoni che le piaxe de più de Te Toca Ti, el so ultimo album, i’è Emigrassion che la parla de la diaspora veneta del pasà e dei novi veneti de ancò rivà da tuto el mondo e Benvenuti in Veneto. El testo de sta canson no l’è mia benevolo intei confronti del Veneto. El dixe sceto che tante olte de drio a sta nostra società osesionà dal laoro no ghè niente: el ga raxon! El laoro el nobilita l’omo ma el laoro finalixà al laoro no’l ga senso. Magari se i veneti oltre a laorar i se domandase anca parcosa i laora e ndo l’è che i va a finir i so schei che l’Agenzia delle Estorsioni periodicamente i ghe roba, eco, magari le robe le narìa un fiatin mejo.

Luca Schenato
Pnv Verona