Un mexe fa scarso gavèo scrito un articoło otimista sul’andamento dełe tratative tra PNV e VENETI-INDEPENDENSA par ła creasion de un partito unitario par l’indipendensa del Veneto, che ragrupase łe do coalision indipendentiste che gà partesipà ałe ultime elesion regionałi de marso 2010.
Ancuò purtropo la situation ła xe canbiada e łe prospetive no łe xe pì łe stese. A xe intervegnùe da tute e do łe parti rigidità e inconprension che sta metendo un fià in pericoło el proceso de fuxiòn.
No ghe xe ne colpe ne raxòn, come senpre in ste situation. E ło digo un fià dal de fora, visto ke a gò decixo de far un paso indrìo proprio parkè fose pì fasiłe catar un acordo sodisfacente sensa ła me prexensa ingonbrante.
Ałora deso me permeto de far na oservasion. Parlando cołe baxi dei partiti/movimenti a ghe xe na vixion comun sul fato che el proceso el gà da nar vanti e che xe un sbalio fermarlo. Parò co se parla i dirigenti dei partiti sta armonia ła finise e vien fora i problemi, łe poxision de kiuxura, i ultimatum.
Bixogna che se metemo tuti ben inte ła soca che dovemo far tuti un paso indrìo, e parlo ała me parte in sto caxo.
I dirigenti dełe do parti i se daga un tenpo masimo pa vedar se i cata un acordo e se no i ło cata, al tavołe dełe tratative se gà da sentar altri mediatori e i dirigenti i fasa – TUTI, GNISUN ESCLUXO – un paso indrìo, come ke gò fato mi.
Vutu forse vedar che ała fine se senta suła toła ła baxe dełe do organixasion e łore sì che łe cata ła sołusion ideale par tuti?
Cari amisi de VENETI-INDEPENDENSA e del PNV: a no ghemo sielte, ła strada ła xe obligada.
Forsa e corajo, che ghemo da costruir un partito grando insieme, el momento el xe bon, ła połitica tałiana ła xe fata da xonbi onti e afaristi, ke no ghe ne frega gnente del nostro ben. Costruimo insieme l’alternativa połitica pa un futuro de dignità.
Costruimo insieme e da bravi fradei el partito unitario pa l’independensa veneta!
giane
If you liked my post, feel free to subscribe to my rss feeds
Firma per il VENETO INDIPENDENTE!
I 120 Dogi della Serenissima Repubblica di Venezia
Iutane, fa na picola donasion!
Veneto è chi il Veneto fa
il pnv su facebook
twitter
Scottish National Party, SNP
BlogoSquare
Bravo Giane, no ghe xe scelta, xe deve far un partito unico piaxa o no piaxa, xe quelo che chiede i veneti e se se vol rappresentarli bisogna sora de tuto cominsiare da ste robe.
Dobbiamo metterci tutti al servizio del Nostro Popolo Veneto, della Nostra Bandiera e di San Marco, lasciamo perdere gli individualismi. Puntiamo all’indipendenza uniti in modo inscindibile, con il coraggio e l’umiltà che ci hanno sempre contraddistinto come Popolo. Mettiamo da parte noi stessi per un bene più grande e non sentiamoci eroi nel farlo, perchè è il nostro dovere di Veneti. VIVA SAN MARCO, VIVA IL VENETO INDIPENDENDENTE.
“xe quelo che chiede i veneti”
Sicuro? I veneti no i sa nianca che ghe semo, come fali a chiederne calcosa?
“Mettiamo da parte noi stessi per un bene più grande”
El me ben pì grando…a son mi. Mi difido da quei che i me parla de “bene comune” o “sol dell’avvenire” o “immorlarsi per la patria” parché i’è quei che i ne lo mete senpre in chel posto. Metar da parte nialtri? Mai! Agire par rivar all’indipendenza par esar pì libari, quelo sì. Se te me dixi de lasar perdar el me individualismo, cioè mi, e deventar on numareto, no grasie. El problema no l’è mia l’individualismo ma el personalismo, che i’è do robe difarenti. De individualismo ghe n’è masa poco!
Dito coesto, a son favorevole a n’union co i Veneti ma le robe le ga da esar fate par ben e no a la carlona
jiera da vèdalra.
e paroe xe un conto, i fati tuta naltra sostanxa e i mete l’homo al scoérto, senxa mascare (dai fati se capise tuto).
xe pì faxie conbinar on bancheto che capir come ciamàr de boto pì veneti pisìbie.
fioi no metemo el caro davanti i bò, prima se svejia el popoło su l’indipendenxa (co tute e fòrse poiteghe in opera SOłO par svejiarlo), pò co el popoło el se gvarà ingrandio (e el sarà na vera forsa) se ghe pensarà. ma deso xe masa presto par far ste intese che voì far (forsi me sbajio, me par de capir che gavè ciapà risi par bisi: on partio o movimento no el xe “l’indipendensa”).
voì vardar “chi” e “come” se pol movar n’auto e no ve sì interesai de vardàr se gà le rode (e le rode no e ghe xe, come savemo tuti. semo cusì pochi da no formar manco el sercion dea roda de scorta).
ma nialtri semo coà no in te le aspiraxion de i movimenti vu.
nialtri semo parsone. veneti sì stufi de l’itaglia, ma se continuè cusì ne spinxarè vialtri in itaglia.
graxie giane par el to intervento, xe ben par nialtri savèr.
mi gò respèto de el to ato, intenxion, ciaressa. crèo de capir ła to amaressa danànsi a sti atriti (forsi ła xe anca coea de tanti altri de vu).
me sò sfogà.
no vorìa parèr invadènte, ma se podarìa savèr almanco on particołar de ste incomprenxion? tanto che nialtri podemo farse nidea.
STO ASPETTANDO l’alba de quel giorno spero che nol sia abbastanssa lontan da non vedarlo , ewl VENETO nol poe aspettar , el ga bisogno de l’aria nova in mezzo a tanta ipocrisia ,le incomprension le nasce da l’orgoglio sensa freni non certo da persone umili e socievoli.
Le divixion xe’ strategicamente imposte da chi che ne teme e in te un modo o in te ‘naltro xè in grado de condissionar e scelte de qualcun. Vanti de sto passo restatremo senpre divixi. El momento xè grave: tuti ghe ne parla ma nesuni se move. Massa gai che canta, no fa mai vegner jorno ! El problema xè che tuto ga da partir daea baxe. I soci PNV e Veneti xei d’acordo, proprio pal principio de susidiaretà a cui tuti se rifà?! Bon eora vanti. Xei contrari in via de prinsipio ?! Fermi tuti e ognun par la so strada. E rendite de poxision de qualcuni no rende giustissia ala cauxa del Indipendensa. A qualcun gheo go ditto: i problemi personai xè un modo par mascarar ea smania de comandar. Voemo capir che ghe xè un Leader indipendentista da individuar e da sostegner. Uno che parla a nome de tuti, uno che bastona co xè ora de bastonar, uno che gà carisma e che tira ea xente. Uno che co punta ea svelja ai Veneti, la fa sonar co forsa e vigore…ma cossa ghe xè da spetar ? Finchè ghi ne parlemo dentro a un sercio saremo senpre pochi…e barufanti !
‘l ha dita just Giane, sion nkora poki e se jà des katon barufa fra de noi ol dir ke tant distante no se va. Ki ke ha da ciakolar i se parle, se no i riva a gnent ke se parle altri.
Nkora no sion numero, kindi gnenti individualismi o personalismi.
Nkora no avon la bicikleta, kindi fone komè a dir ki ke guida e ki ke pedala.
Umiltà, testa basa e ke vae in mona an fià tuti
In ‘sti mexi (in modo ativo) e in ‘sti àni (da oservatore) a go notà ke i pì grandi nemighi de i vèneti sinceramente indipendentisti i xé do (2)… do stati mentali:
1) el pensare a l’ italiana (o mèjo a l’ italiota).
2) metare la propia ideologia davanti al propio sentimento indipendentista.
– Par el pensare a l’ italiota, a no ghe xé tanto da fare, ghe xé da parte de ke altri indipendentisti a spetare ke ‘l indivisuo vèneto indipendentista oncora abituà a rajonare a l’ italiota el scumisia a vegnerghene fóra… a xé un fià (come ke digo senpre mi) come destarcarse pian pianelo da la makina de Matrix.
Spècie par ki ke vive in Vèneto, ke ‘l xé circondà da la realtà-virtuale italiota… vivendo in un posto forèsto, forse se xé avantajà, parké se ga na vixuale pì ojetiva e se ga la fortuna de esare pì obietivi, ma par el resto, la xé na cuestion de distacamento da la falsità italiota e de descovèrta de la realtà vèra.
– Par el secondo discorso invese, el xé un problèma ke no ‘l existe solo inte la scatola italiota, anca se drento la scatola italiota el vien exasperà a i masimi liveli.
Comunismo, socialismo, liberismo, libertarismo, e ki pì ghe ne ga pì el ghe ne meta, le xé tùte ideologie e pensare de costruire l’ ideale (no ideologia) indipendentista vèneto partendo da na ideologia el xé el sbalio pì grando ke se pòsa fare.
Prima se xé indipentisti e dopo vien el resto, ma el resto no ‘l ga da interferire su el fàto de esare indipendentisti.
Infati, rajonare secondo ideologia a porta a un pèr de grosi problèmi:
a) no fidarse de cueli ke proclama ideologie difarenti, sensa rendarse conto ke no vol dire gnente, parké se xé tùti indipendentisti
b) fare rajonamenti inutili e asurdi su Stati futuri ke no li existe e ke se se continua cusì gnanca no i existarà… come ke cualcuno el ga dito a se ris-cia de metare i bòvi davanti a ‘l caréto.
Mi penso ke el primo problèma (1) el sipia problèmatico par I Veneti e ke invese el secondo problèma (2) el sipia problèmatico par el PNV.
Mi me récordo ke i primi dì de Università i profesori i ne dixeva ke dovevimo fare “tabula rasa” de tùto cuelo inparà a le scole superiori, parké a l’ Università lo se saria inparà sóto n’ altra prospetiva, pì anpia… i gheva raxon !!!
Noaltri dovarisimo fare “tabula rasa” de “pensiero a l’ italiota” e de “pensiero ideologico”… e concentrarse solo su ‘l ideale indipendentista.
ideologia: “Sistema di idee e princìpi che sta alla base di un partito, di un movimento politico o religioso”
Arda che anca l’indipendentismo l’è n’ideologia.
“Prima se xé indipentisti e dopo vien el resto,”
par quanto me riguarda, NO. Mi so independentista parché son libartario, no el contrario. Ripeto, par quanto me riguarda.
Far tabula raxa del “pensiero ideologico” l’è estremamente pericoloxo, Mi go le me idee e rento al Pnv ghe altri che ghe na altre ma nemo ben parché strategicamente volemo la stesa roba, cioè un stato veneto. Tuto qua, lasemo perdar lavagi del zarvelo de tabule raxe, par carità.
Luca el scrive:
>
> “Prima se xé indipentisti e dopo vien el resto,”
> par quanto me riguarda, NO. Mi so independentista
> parché son libartario, no el contrario.
> Ripeto, par quanto me riguarda.
>
– E i comunisti baschi i xé indipendentisti parké comunisti?
– E i socialisti catalani i xé indipendentisti parké socialisti?
– E i socialdemocratici sardi i xé indipendentisti parké socialdemocratici?
… E Luca Schenato (libartario), el xé indipendentista parké libartario …
Se te ghe lèvi via i punti de dimanda a le fraxi ke go scrito cuà de sôra, in modo da trasformarle in afermasiòn e te ghe apliki n’ operasiòn logica (de la matematica) su i predicati ke ghe ne vien fóra, vale a dire l’ operasiòn de intersesiòn (ke la xé anca n’ operasiòn insiemistica) te otièn cuelo ke ghe xé de “comune/uguale” fra tùte le fraxi scrite: INDIPENDENTISTI.
Cuindi, anca se “par cuel ke te riguarda” prima vien el libertarismo e dopo el indipendentismo, cuaxi come conseguensa, purtropo te go dimostrà matematicamente ke la xé na verità solo tua… un fià come ke xé la religion… totalmente sojetiva.
E par far numaro ghemo bixogno de trovare i punti in comune, no cueli ke ne divide.
L’ amalgama de persone diverse la se fa a partire da carateri comuni, inte ‘l nostro caxo ‘l esare INDIPENDENTISTI … el resto no fa parte de l’ intersesiòn sôra esposta … ansi, metare drento el calderòn robe ke no revarda l’ indipendentismo a podaria esare pericoloxo, parké inconpatibile co ‘l réxultato de l’ intersesiòn, ke ‘l xé apunto cuelo de esare INDIPENDENTISTI.
Confermo la me inpresiòn su ‘l punto 2 de ‘l me precedente mesajo in relasiòn a ‘l PNV… el xé el só pì grando punto debole.
“E par far numaro ghemo bixogno de trovare i punti in comune, no cueli ke ne divide”
Pensito che mi no sipia mia d’acordo? Lo go anca scrito.
“metare drento el calderòn robe ke no revarda l’ indipendentismo a podaria esare pericoloxo”
Ognuno el porta el so contributo.
Personalmente me par che scrivar na olta al dì INDIPENDENZA e basta el sipia un fià limitativo. Lodovico par exenpio, fra le altre robe, ghe mete le analixi economeghe che no i’è neutrali ma liberali, cosa gavereselo da far? No starghine a parlar parché no propone mia on veneto comunista?
El to discorso me par n’atimo fora da la realtà. Mi sarìa STRAcontento se drento al Pnv rivase na marea de tipi con n’inpostasion socialdemocratega parché vorìa dir che semo so la bona strada. Mi no inpongo mia la me vixion, ghe mancarìa!! A dago sol che el me contributo. Punto.
Cosa elo che no revarda l’indipendentismo? Gavemo da dar na vixion del futuro stato. xà deso la xente l’è terorizà e ne dixe “salto nel buio”.
l’indipendensa par mi a xe indipendenxa ponto.
i agetivi che pò i ghe pol essar aplicai da ła propria cognixion, deso no i ghe entra.
in te naltro me post, so naltro articoło, gavevo ciapà on esempio de na mela (indipendensa):
on la vede verde.
naltro rosa.
staltro xała.
el guaio xe che deso “se ghe vol dàr el cołor” (se vol darghe el tipo de goerno o indirisso poitico o coel che ne par pì ovvio) parchè el cołor el vien confuso co el sogeto.
el xe on guaio che ne mete on contra staltro.
luca el gà riportà el disionario itagliano so el senso de “ideologia”.
bòn, deso seremoło e vardemose nei oci:
par nialtri veneti serenissimi gà vuo senso ła poitega dei stati itaici so 3 mie ani?
no.
i serenisimi i gà portà in europa pì senso e savèr goernar.
deso no semo pì boni de catarne poiticamente parchè i ne gà imbevùo el xarveo.
co vardemo a on posibie goerno de nu, o vedemo sempre a striche bianche rose e verdi.
el nu no el sarà mai on goerno veneto puro, ma on goerno itagliota in te na tera che a crèe de essar indipendente (sarà indipendente soło de burocrasìa, no nel cor).
coel che gà scrito luca:
“Mi so independentista parché son libartario” me fa pensar che el gà meso ju steso (el so modo de sentirse, cioè libartario) sora a l’indipendenxa de on popoło intiero. mi, par esempio no so libartario, ma manco de sanca, de drita … e manco che manco “trasversae” come el gà scrito gianluca panto in tel so articoło:
“Siete di destra o di sinistra?
Siamo trasversali, l’unione fa la forza…”
(xe vero che a unjon fa a fòrsa… ma propio sta sòrta de fòrsa?)
mi son veneto e vojio catàr da novo el fondamènto veneto, coei che i xe i bexogni de el popoło veneto in te ła tera de nu.
co me girarò, e vedarò che forsi el fondamento veneto el gà tochi compagni de staltri goerni… beh sarà na coinsidenxa, mai on ponto de partensa.
ciò luca,
varda che xe par parlarghene. no a gò su co ti.
ciao vecio 😉
@Luca : forse a xé colpa mia ke no so bon de spiegarme… e alora me fermo cuà.
@Vianelo : gràsie de gaver detalià (a modo tuo) el tema ke go proposto in ‘sto topic…. vedo ke se semo capii.
Mi a credo ca pì de on el ga meso a fogo on punto importante de tuta sta vicenda: la baxe, ovèro la popolasion.
Vianelo, ma anca Stefano V., i ga postà atension a sto punto, ca condivido.
Come ca condivido el punto de vista de Luca, ma no tanto par raxon “ideologiche”, ma de conceto. Difati credo ipocrita pensar ca on el sacrifica elo isteso par on “ben comune”. O mejo, a ghe sarà anca in serta mexura na roba del genere, ma la xe solo e soltanto so baxe volontaria individualista: xe na sielta de la persona se o manco sacrifegarse, parché fondamentalmente la persona come qualsiasi animale de sta tera el varda par ela istesa prima de tuto. E coeli ca pretende de stabilir lori diversamente xe inte la mejo ipotexi incapace de tegner conto de la realtà, e in te la pezo on ca perpetra ati de violensa.
Mi a credo quindi ca ogni on ga le so motivasion, ma ala fine TUTI i pensa ca i vol cavarse fora na oportunità de ver on stato pì aderente ai so ideali. Dopo cosa sipia sto ideal, no sempre colima co coel de altri.
Coesto xe el put-pourri ca mete insieme diverse aneme de independentisti.
Le elite le xe sempre coele pì rigide ai so pensieri, e donca xe pì fadiga catar on colante, la baxe de solito la xe manco ferma, solo parché la ga le idee manco ciare e facilmente la cata acordi ca dopo però i podaria scontrarse intei fati prateghi.
A xe come coeli ca se acorda par far on lavoro, no i va so i detaji e no i se spiega par ben. Durante la opara, capita de le contestasion, e la tipica fraxe la xe “ma mi credevo…” “ma ti no te me gavevi dito…”
La elite pì iluminà la gavaria da acordarse so minimi punti ciave, consapevole de le profonde difarense ca ghe xe dadrio, solo strumentalmente par ver pì forsa insieme. Tegnendo ben da conto ca co rivarà coel dì se gavarà da spartirse la torta.
Concludo co na nota “ideologica”. Mi a credo nel dirito supremo de la Persona, e son consapevole de el sentimento e la utilità de la agregasion coletiva. I omeni i xe come lupi: individualisti, ma par mantegner sano el branco, boni anca de agregarse par defendar el branco sensa de el quale la so istesa individualità no la podaria existar.
El trade-off el stà tra acetasion de le “necesità agregative” ca tende a skisare i “godimenti individuali”, e i “godimenti individuali” ca ste “necesità agregative” le dovaria salva-vardar.
Ma tornando OT, ala fine, serve la consapevolesa de la zente, no solo la “baxe”, ma proprio la zente parché anca ste baxe le xe vèramente magre!
ERRATA: Intel me precedente intarvento me son magnà on toco. Reporto la fraxe completa, e me descuxo par la svista:
***
El trade-off el stà tra acetasion de le “necesità agregative” ca tende a skisare i “godimenti individuali”, e i “godimenti individuali” ca ste “necesità agregative” le dovaria salva-vardar.
Par come la vedo mi, el me trade-off el stà intel agregarme co persone ca le condivida la idea de dar el masimo valor al dirito supremo de la Persona come individuo, co luri mi son dopo disposto sacrifegar sto individualismo al masimo, parché luri i me garantiria la existensa de on “branco” de persone respetoxe de la me libartà e de la me individualità.
***
…Zonto na oservasion.
Par via dei problemi de fuxion tra PNV e mov. Veneti (o PDV?) mi no credo ca in sto caxo se sipia tanto fini ca i ostacoli sipia dovesti a coestion de ideali.
No, me pare mi ca la coestion la xe meramente de voler da na parte on sistema de diretivo e da coelaltra on sistema de dirigensa distribuia.
Ghe ne parlarò mejo in te on articolo ca deso vago a scrivar. [Edit: ecolo kive ]
Claudio el scrive:
> No, me pare mi ca la coestion la xe meramente
> de voler da na parte on sistema de diretivo e da
> coelaltra on sistema de dirigensa distribuia.
> Ghe ne parlarò mejo in te on articolo ca deso
> vago a scrivar.
>
Dimanda bèn e informite bèn… ‘sto discorso de diretivo e dirigensa distribuia… se mai i xé sta vèri in pasà a me par ke dèso no i valga pì…. o se i vale i xé invertii (intendo dire ke i ruoli i xé invertii) rispèto a come te me li ghevi spiegà ti racuanti mexi pasà…. te fàso notare còsa ke Giane el ga scrito a un certo punto :
> Bixogna che se metemo tuti ben inte ła soca che
> dovemo far tuti un paso indrìo, e parlo ała me parte
> in sto caxo.
Ke condivido in pièn.
[…] è parlato di problemi con la fusione PNV – mov. Veneti, e mentre l’autore dell’articolo ha parlato di fare un passo indietro, e lasciare che […]
ciao claudio,
me piaxe ła to disponibìità in tel diałogo.
sò imbaraxà a scriver sia parchè no xe che ghe ne sapia sora de vialtri, sia parchè so che par coretexa dovarìa postar anca su staltro movimento.
me par de intender che coel che ti dixi el vada a cascàr sempre so el modo de goernàr o ła dificoltà de catarxe par formar na diretiva.
sempre se gò capio puito, coel che intendevo mi invexe jera che sto coà el xe on paso de doman e no de ancùo.
no meto in discuxion el modo de raportarve (in caxo darìa pareri, parchè dovarìa essarghe drento anca mi in tel vostro raporto par discutarne).
coel che ti dixi, par mi, el fa parte de on raporto tra movimenti. e par mi xe presto par parlarghene.
anca ła serenissima gà avuo difarenti faxiòn, ma e xe nàe co ła republica ła jera xà fondadada da on toco.
anxi:
gò oservà ła storia de difarenti polui.
cavemo i goerni ditatoriai e de tirani, se oserva che el popoło, de coei pochi homeni che jera formà, el jera unìo par metar su on goernèto. se tuto funxiava, se ghe ne xontava altri homeni de propria vołontà, e pò altri ancora. el goernèto el deventava goerno.
ma no xe mai suceso che se gapia fato on goerno senxa popoło, e pò el goerno ndava a torxio par catarlo (me par che vialtri movimenti si drio far coesto).
xe grando el laoro che se drio far ło riconoso, ma mi vedo che se drio butar in mar tante fòrse soravia anca coalcheduni (popoło) che par strada se scoraxarà o dejudarà.
se voemo svejiar el popoło dovemo prima “essar nialtri sveji” (no che ło svejiemo soło par el fato che se ribaltemo in tel leto agitai da on nostro sognamento (indipendenxa). che ałora vol dir che dormimo tuti).
se ti va a svejiar i tui parchè dovè ndar in spiaja, no ti te presenti co a lista de regoe par pareciàr vaixe, barbecù, ombreoni… (che faria parte de na gestion):
prima te i sveji e basta.
pò i se alsarà da soi e i farà coel che xe necesario.
co i sarà pareciài, scomissiarè a organixarve so tuto (xe rivà el momento de ła gestion).
Vianelo, prima roba, OT: te prego de doparar S par le sorde (sibilanti), e X o Z par coele sonore, se no faso fadiga lezarte (e pardona ca no doparo la L tajà …problemi de tastiera).
Vegno a’l to intarvento.
1) No sta pì dirme “voaltri”, parché el prosimo giro me incaso 🙂
El PNV el xera nato co la idea de eser de tuti! E po’ mi deso me son ritirà.
Motivo? No vedo el popolo.
2) a parte ca el modo de governar el xe importante (te fidaresito ti de darghe in man el to futuro a na manega de zente ca la ga idee ditatoriali? El xe on exempio estremo, ma no tanto).
3) par mejo detaji, lexi el articolo ca go scrito kive: https://www.pnveneto.org/2010/07/7661/
Come te vedarè mi penso serve el popolo prima.
Però a sto punto lasame dir na roba. Sicome tanti xe bravi a far oservasion, e dir “voaltri”, ma dopo no ghe xe nisuna asion concreta, mi a go decixo de tirarme indrio. No vedo parché a go da consumar energia par persone ca le xe live e le speta la panà fata dai altri.
No digo de ti, ninte de personal co nisuni in particolar, ma digo in general.
@claudio
a se coremo drio co el gato e el sorxe.
scusime ma no go pratega de scritura 🙁 . so drio de sercar al mejio.
co “vialtri” me riferiso a chi che xe drento al partio (parchè coesto xe el so sito). no so chi se gà iscrito. se ti no te ghe si… ben. no ło savevo. forsi ti dovarà ripetarlo ancora parchè no tuti coei che i scrivarà cognose chi xe drento el pnv e chi che xe fora.
(spero de no averte urtà).
no digo che el goerno o el modo de goernar i sipia de poca importansa (no go usà scałe metriche), digo soło che deso no xe el momento de ciarirse so el modo de goernar.
co ti ło gà visto anca ti che no ghe xe el popoło. par mi coesto fa 1+1=2 e concordo co ti.
si, gò éto el to articoło e te ringrasio ma gò xà meso ła me risposta (ła riguarda el raporto tra partìi).
deso vegnemo al sodo:
te dixi “Sicome tanti xe bravi a far oservasion, e dir “voaltri”, ma dopo no ghe xe nisuna asion concreta, mi a go decixo de tirarme indrio. No vedo parché a go da consumar energia par persone ca le xe live e le speta la panà fata dai altri.”
xe vero semo in tanti a parlar ma coesta a xe a nostra asion.
on popoło che dixe. on popoło che rebalta anca on movimento co critiche o che colabora soło co pareri.
invexe xe chi che goerna (o chi chel se sente portà a coesto) che el gà da saver tor su a voxe del so popoło. se nol xe bon nol pol spetarse che sipia el popoło a movarghe e so gambe.
anca mi no so iscrito a nisùn partio. ne veneto ne taglian.
se da “sora” i te fa vedar che i se varda tra de łori sensa tegner da conto che el fondamento de tuto el xe el popoło, cosa ti pensi, che mi ghe cora drio?
xe anca massa che mi daga pareri, parchè co ti sa anca ti, tanto dopo i fa coel che i vol łori (“łori” xe in general, ma nel to articolo, staltro movimento pararia su ła “bona” strada). e ti che ti gà da on contributo, fusse anca na fregoła ma dada co intenxion bona parchè altro no te ghe riessi, te torni a ła to vita che “forsi xe mejio cusì”.
se i partìi i voria che tuti i faxese coalcosa, i gà anca da tegner conto che tuti i gà ła so testa. a xente a sa vedar e vałutar el partio stesso so cosa se mejio par łori.
mi no me lamentaria dei pareri postai su sto sito da xente no iscrita, fuse anca połemiche (par altro, vol dir che el sito el xe éto).
voria dir na roba ma me ła tegno parchè a podaria essar ciapada come ofesa, e no ghe tegno.
concordo da novo co ti xe el popoło che fa a naxion.