PLEBISCITO.EU | PNV. Press News Veneto

Tólto da Venet.net

El video, gira’ nte la giungla dela provincia rebeghina indonexiana de Papua, la fa vedar on ativista politego ferio stexo par tera a fasa in su, sirconda’ da polisia nasional arma’ de na scuadra tatica. El prixonero, Yawan Wayeni, el se storxe de agonia, co la so testa tegnu’ su da on tronco.  Na cuerta insanguina’ la coerxe na ferita verta inflita dai asaltatori co na bajoneta, i so intestini che i sporxe fora dal so stomego. El video de sete minuti, el punto cruciale chive de na nova canpagna pai diriti umani, el fa vedar i omeni che i cojona Wayeni che xe par tera drio morir.

A on serto punto Wayeni el alsa su el pugno in sfida.“Papua libara,” el dixe debolmente, co la testa che pencola.“Come xe che te fe’ a torte la libarta’ se te si cusi’?” on dei so rapitori a lo provoca prima che’l mora. Da co che el video xe sta’ posta’ recentemente su Internet, i ativisti i lo ga dopara’ par far presion su l’Indonexia de lasar aceso foresto ala provincia rica de risorse che i critici i dixe la xe da tanto tenpo sara’ su a xente da fora. Par cuaxi mexo secolo, i Papuani i ga dichiara’ on conflito poco publicixa’ par l’indipendensa da l’Indonexia. Dei grupi de diriti umani i stima che la polisia e le forse militari i ga copa’ diexene de mejari de nativi papuani da co che la vecia colonia olandexe, sul versante ovest de l’ixola dela Nova Guinea, la xe sta supa’ su da l’Indonexia ntel 1963. I ativisti i dixe che dele scuadre elite de ataco, che le opera co poca supervixion a 3000 milia da Jakarta, la capitale, le ga da deceni gestio dele operasion legali e ilegali tipo trafico de legname, prostitusion e comercio de speci protete par far on profito.

“El video a xe na finestra rento on posto tanto scuro del mondo, e el dovaria influensar el governo a cavar via on divieto sui foresti,” el dixe Brigham Golden, on menbro del grupo de asion del Council of Foreign Relations che se concentra su Papua. “Sensa aceso, a xe brutalmente difisile ver informasion da la rento; senplicemente no savemo mia.”Le forse de sicuresa che le opera nte la provincia le include dele scuadre speciali de polisia indonexiana e dele unita’ incognite de anti terorixmo ciama’ Komando Pasukan Khus Indonexian, cognosuo cofa’ Kopassus. Par cuanto lghe sipia denunce de abuxi de diriti umani su tute do le unita’, l’aministrasion Obama la ga decixo de tacar da novo a adestrar le trupe Kopassus, che le considera on alea’ ciave par lotar contro i grupi estremisti silameghi in Indonexia. I uficiali che ga interoga’ Wayeni i faxea parte de l’unita’ dela Polisia Nasional Indonexiana ciama’ Korps Brigade Mobil, o Brimob, i ga dito i ativisti che i ga varda’ el video. Kopassus el ga anca frecuentemente fato exercitasion in Papua, i dixe i analisti. Edward Aritonang, on portavoxe dela Polisia Nasional Indonexiana, el ga dito che i funsionari i xera al corente del video. “Si, lo savevino,” el ga dito, ma no’l ga comenta’ de pi.

El ministero de afari foresti indonexian el mete in dubio che Papua la xera sara’ su ai foresti.“La xente la va la, ma gavemo serca’ de esar cauti,” el ga dito el portavoxe Teuku Faizasyah. “Serti elementi rento Papua i ga proa’ a far uxo de ste vixite par i propri motivi.” I ativisti i dixe che l’onega maniera par intrar rento la provincia a xe de far finta de esar on turista. I giornalisti e i laoratori non governativi ciapa’ a investigar i caxi de diriti omani, filmando dimostrasion o discutendo de politega in Paupua i xe speso deporta’, i dixe i ativisti. I ativisti i ga anca descrito Papua come ver on che de Far West selgavio e incontrola’, dove che i militari i se tole vantagio libaro dei nativi Papuani. “Gnisun a ghe dixe de no,” el ga dito Golden. “I xe libari de far cuel ca i vole.”

La polisia nasional e le forse militari i dopara la tortura e la detension ilegal par far paura e scoragiar i agitatori politici, i ne dixe i ativisti de diriti omani. “I considera sta xente dei ribeli separatisti e i crede che cualsiasi violensa la xe legitima,” el ga dito Usman Hamid, cao dela nonprofit Comision par le Sparisioni e le Vitime de Violensa, che la indaga i abuxi militari de diriti omani. “Varda el video dela tortura de Wayeni. No i gavea rimorso. No solo i ga varda’ n’omo morir lentamente, ma i lo ga anca tolto pa’l sesto,” el ga dito hamid.Wayeni, on ex cao tribale deventa’ agricoltor, el xera sta aresta’ ani fa par on so rolo nte on ataco a na stasion de polisia. El xe scanpa’ ntel 2007 e el xera sta meso nte na wanted list. El 3 Agosto 2009, la polisia la se ga avisina’ al fugitivo a la so fatoria de l’ixola de Serua. La polisia la dixe che Wayeni el ga tira’ fora on sciopo fato in caxa. I ativisti i sostien che el xera dixarma’. El video, filma’ da on oficial co la so telecamara da celular, el mostra Wayeni che’l more ntel so giardin, sfidando i so rapitori dopo esar sta’ bajoneta’ ntel stomego. “Sta tera la xe sta promesa da Dio a naltri, la xente Papuana,” el dixe debolmente. “Wayeni no’l ga mia capio, o no?” el dixe on oficial. “Si, lo so ca son n’omo senplice,” el risponde. “A go solo da tendar el me brolo. No so gninte.”

“Wayeni el siga: “Dio, la soferensa dela me xente, le xe cusi’ tante! I xe drio criar, oh Dio!” On bandito a lo ripulsa: “Dio no’l rispondara’ a le to preghiere. Xente come ti la xe selvadega.” Wayeni a xe sta poi porta’ a on socorso medico, ma el xe morto poco dopo, a ga dito la polisia. Le fotografie grafiche su Internet de on Wayeni ferio le xe salta’ fora in presia, ma i ativisti no i podea coroborarle o pontar a chele sircostanse. A Marso, co che el video xe sta’ posta’ anonimamente e i investigatori Papuani i ga conferma’ i detalii dela morte de Wayeni, i ativisti i ga taca’ far circolar el video ai funsionari del governo indonexian. “La risposta la xe senpre poxitiva, ma el governo indonexian el xe senpre debole; i funsionari no i ga el controlo sui militari e la polisia,” el ga dito Calum Hyslop, el portavoxe par Papua Watch Australia.

“La comunita’ internasional la ga de bixogno de dar suporto al controlo civil su Papua.” El ga ciama’ el video n’avertimento ai Stati Unii sul ver a che far col Kopassus e altre unita’ de elite. “I militari no i xe mia pronti a esar trata’ nte na maniera matura. No i se ga riforma’ co che se parla de diriti omani,” el ga dito. “Cuei che perde i xe i indigeni papuani, fra la xente pi poareta del mondo.” Altri i dixe che anca i indonexiani i ga da far presion par on canbiamento a Papua. “Se la voxe grosa la vien solo che da fora, la reinforsa on punto de vista che sti sighi de sdegno no i xe altro che na motivasion sconta par tor le richese de papua via da l’Indonexia,” el ga dito Sidney Jones, consulente senior al programa axiatego dela nonprofit International Crisis Group. “A ghe ga da esar sdegno dal publico indonexian par ver on vero inpato.”