PLEBISCITO.EU | PNV. Press News Veneto

A son pena tornà da un weekend co me mojere a Firenze. Na sità favoloxa, de na belesa unica. La gaveo visità tanti ani fa e me parea doveroxo farghe on salto e pasar do giorni a caminar e magnar ben.

L’è sta divertente asè parché i fiorentini i seitava a parlarne in inglexe. Intei ristoranti, par strada, intei negozi: el jera tuto un “hello”, “thank you”, “do you speak english?”. Mi no faxea altro che dirghe che, sì, a jero veneto ma no i staxese a preocuparse che lo capiso el talian. Niente, no i jera boni de capir. La roba divertente l’è che magari a quei de fianco a nialtri, italofoni anca luri ma magari che i vegnea da la Puglia o dal Piemonte, i ghe parlava tranquili in talian. A nialtri niente: “english?”

Va ben, a go pensà, parlemoghe pure in inglexe se i vol parlarne in inglexe. E lora gavemo tacà a parlarghe in inglexe. Sì, se semo divertii fà do butini 🙂 Dopo i dixi che ghe xe problemi de comunicasìon tra i veneti e i taliani. Ma indove? A gavemo sol che l’inbaraso de la sielta, a podemo parlarse anca in inglexe! Dopo ghe da dire che i fiorentini i’è veramenti gentili e costumà. Vardè la foto qua de fianco: cusita gentili da metarne le scrite intei bar anca in veneto par farne on piaxer! Se vede che i ghe ga dito che la nostra lengoa mare la se ciama veneto e no talian e lora, magari parché i veneti che i vixita Firenze i sarà tanti, i se ga atrezà. Sì, besognerea dirghe che i ga sbajà na vocale: no se paga pAr sentarse. Però dai, masa brai isteso.

Par tuta sta infinita gentilesa che i ga intei nostri confronti mi propio no capiso mia tuto el caxoto che tanti i fa par la festa de l’an che vien de l’unità de lo stato italiano. Ma parcosa gavaresimo da dirghe su ai taliani? Eh? Ma mi sarò ben contento par lori, a ghe mancarìa! Parcosa gavaresimo da esar cusita vilani da no esar contenti par l’unità de lo stato italiano? Ma ve sìo tuti inseminii? Anca nialtri veneti l’an che vien a ghe diremo brai ai taliani e ghe strinxaremo le man par la loro festa de l’unità. Sì, l’an che vien l’è nostro obligo moral esar contenti par i 150 ani de unità de lo stato italiano. Viva el stato italian del 1861! (vedi zone arancioni de la cartina de soto).