PLEBISCITO.EU | PNV. Press News Veneto

Tólto da GaxetaVeneta

Sa a ghèsimo far on exènpio de la situasiòn de ancò, la Lega Nord la xé fa chìli ca li se mète fòra da la pòrta de la céxa pa inpedìrghe st’altri de ndàr fòra. Eco, la cèxa la raprexenta la itàlia sto gràn contenedòr a ndo li vol ca vivémo.

In sto momento stòrego la Lega Nord la xé el nemìgo nòmaro 1 de la libartà dèi Pòpoli, la xè drìo fàr da specièto e deviatòr, coalixàndo miliòni de consensi co fàlse promèse. La verità drìo el pàlco la xè ca la Lega la xè on partìto taliàn co la funsiòn de tignìr tùto bòn, tùto sòto contròlo e canviàr gnìnte. La Lega Nord la xé funsionàl al sentralìxmo romàn e la xè la solusiòn taliàna pa blocàr le aspirasiòn de independensa déi Vèneti, dei Siculi, dei Sardi, dei Furlàni, dei Tirolìxi. 20 àni de Lega Nord ne la dìxe ciàra, no ghemo no sòlo vìo gninte, ma diritùra a sèmo drìo ndàr vèrso la pèxo mixèria e depresiòn durànte sti 144 àni de dominasiòn taliàna. Bòssi Umberto a lo sa puìto e el tien sòto el so tàco in mòdo totalitàrio, tùti i politeghi e militànti de la Lega Nord. Sìto on cojòn? Sìto servìle? Puìto, la Lega Nord la te dà la carèga, èco parchè xénte fa Lùca Zaia e Gobbo Gianpàolo li xè al podèr. Le carega, le se dà a chi ca sèrve e no fa dimànde o pa stupidità o pa servilità.

I militànti li scuminsia no crèdarghe pì. El scòntro Fìni-Berlusconi el sèrve dàrghe tenpo e credibilità ai eletòri de la Lega, serve tignìrli bùni fa dìrghe “A no xé mia colpa de la Lega Nord sa si ncòra inte el luàme”.

L’independentìxmo, el ga da scardinàr, destruturàr, la Lega Nord e fàr deventàr ciàro ai so eletùri la falsità e malafède, oltre ca ignorànsa dei vèrtisi de la Lega Nord. Ghemo da Mètar in evidensa le buxìe de Bossi, le fàlse promése, l’ipocrixìa. E ghemo da fàr na atività de destruturasiòn ideolojega propio fra i militànti de bàxe fàndoghe capìr ca li vien tòlti pal da drìo. Ghemo da smascaràr la Lega frente i so stìsi supòrter de bàxe.