PLEBISCITO.EU | PNV. Press News Veneto

Na natural evolusion de un organo de informasion chel diventa grando

Da domenega xe canbià un mucio de robe. Come che in sti dì gavarè vuo modo de lexar, deso la batalia połitica indipendentista ła va rento su na faxe nova e inportante.

Xe drio pareciarse na autentica machena da guera pa l’indipendentismo veneto, come mai fin deso se gavea mai visto. Podemo soło antisipar che el futuro ne riservarà sorprexe un mucio grandi e straordinarie, parké se xe vero che i partiti taliani ormai i se gà incancrenìo e i gà butà ła gramegna su ogni aspeto deła nostra vita ocupando un stato nemico, xe altretanto vero ke i veneti i ghe ne gà senpre pì łe scatołe piene de sta situasion e donca na proposta indipendentista forte e unitaria ła gà tute łe carte in regoła pa diventar ponto de riferimento e agregasion del canbiamento che ne portarà ala costitusion del Veneto Stato Indipendente.

Se pol ben capir ła forsa e l’autorevołesa de sto straordinario progeto połitico de nome VENETO STATO dal siłensio asordante dei mexi de comunicasion aservii al regime tałian.

Par cuesto, dopo ła nasita de VENETO STATO, anca el sito che gà contribuìo a rendarlo realtà da ancuò el canbia obietivo, pasando el testimone de partito połitico de cui el gera el megafono mediatico al novo sito www.venetostato.com.

El nostro novo obietivo el sarà donca n’altro.
Gavemo ła consapevołesa de ver cresùo na bestia granda in termini de comunicasion. Meliari de persone ogni setimana i pasa su ste pagine e i pol informarse su notisie połitiche venete che no łe cata spasio sui vari gaxetini, coriere del Veneto, tribune, nove e matini vari che i sa ben come manipołar l’informasion, stuarla, controinformar e sercar de tegner el nostro Popoło Veneto nel’ignoransa e inbaucà su.

Par sto motivo da ancò PNV no vorà pì dir PARTITO NASIONAL VENETO. Tuto el so patrimonio połitico el vien łasà in eredità a VENETO STATO.

Da deso PNV vol dir PRESS NEWS VENETO.

El nostro sito www.pnveneto.org diventarà donca na sorta de organo de informasion e de comunicasion fondamental, forte dei contenuti e deła potensa mediatega web chel se gà concuistà co tanto lavoro e co tanta tanta pasion e spesor inteletual che in tanti i ghe gà profuxo. Portè donca pasiensa in sti dì parché alcune sesion del sito łe vegnarà trasformae man man che pasemo el testimone a VENETO STATO.

Oltre che organo de informasion libara e de spesor, el aconpagnarà un novo progeto cultural e formativo de cui ve parlaremo fra pochi dì. Xe in gestasion na vera e propria THINK TANK che spasiarà dała storia ala geografia, dała połitica al’economia e fin anca ałe cuestion internasionałi.

PRESS NEWS VENETO el aconpagnarà altre inisiative de comunicasion de gran portata mediatica existenti o che partità in futuro, come par exenpio el canal VeNETvision prexente su YouTube, o come el digest cuotidian de notisie foreste Venet.net o come el portal sportivo Rugby Veneto, oltreché tute le nostre atività sui social network, a scumisiar da facebook e twitter.

Se gavì pasion e savè scrivar ben, cuesto xe el momento bon par proporve a www.pnveneto.org par contribuir a portar luce ala nostra batalia par l’indipendensa del VENETO STATO.

Gianluca Busato
PRESS NEWS VENETO
www.pnveneto.org