Capital Gain al 2%

El stato talian tasa al 12.5% el capital gain, e cioè, co che se vende dele asioni el stato el se ciapa 1/8 del guadagno fato: Na asion cronpà a 100, na cuindexena de ani fa, se vendua a 300 ancó la da on guadagno de 200, e de sti doxento el stato talian el se ciapa 25 (el 12.5% o 1/8) de tasa.

Pararia na tasa basa sul capitale, rispeto ale tase sul laoro, ma se ga da tegner conto che el capitale el xe tanto pi mobile del laoro, e cioè xe tanto pì fasile portar legalmente i sparagni via in altri stati che tasa de manco. Par sto motivo podemo dir che ghe xe pi conpetision fra stati su sto tipo de tase elora no le pol nar masa alte. Difati el 12.5% talian el xe anca relativamente baso, ma no xe sto chi el punto de sto articolo.

El punto xe che tanti asionisti de picole banche ntel nostro teritorio i ga risevù in sti di la oportunità de pagar solo che el 2% de sta capital gain tax. Ma presto! L’oferta la scade a fine mexe, i ne conta. Vedemo cosa che ghe xe da drio e cosa ne convien far.

Intanto la motivasion da drio sta magnaminità del governo talian a xe che i ga da far casa, imediatamente e co afano disperà. De na tasa al 12.5% no i se ne fa gninte se nisuni vende. Alora co sto 2% i te da la posibilità de PAGAR DESO sensa vendar, e dopo nte la eventualità de vendita se paga sui guadagni a partir dal valor atual (ntel nostro exenpio, 300). Se ti te ghè 1000 asioni cronpà a so tenpo a 100 e che le vale deso 300, i te dixe paga entro fine mexe (che dopo l’oferta la scade) el 2%, 4000 euri cash, 2% de 200000=1000x(300-100).

I te mete de fronte na oportunità, e se ga da valutarla. A xe na manovra che forsa inevitabilmente la vendita de asioni bancarie, co a) vantagi neti pa’l croupier (el stato talian), b) svantagi sicuri par le banche, c) vantagi solo pai sparagnadori atenti, e d) na perdita (come minimo de oportunità) pai sparagnadori ochi.

Prima de analixar, tegnemo da conto che sta oferta la xe sta fata solo a asionisti in picole banche che no le xe cuotà sul marcà, dove le asioni le vien vendue internamente e el valor dele asioni el se baxa su dele “perizie”. Seconda roba, no xe cusì imedià la vendita, alcuni mexi te poi, altri no, e pol pasar setimane se no mexi prima de finalixar na vendita.

Dal punto de vista del stato talian, i xe disposti a perdar nel lungo termine (potensialmente tasando al 12.5% ntei ani venturi), pur de far casa entro fine ano. I xe disposti a ciapar poco ma subito (el 2%) che de tanto de pì ma diluio ntei ani (12.5%). No i se preocupa pi de tanto de l’enorme debito publico, parché i sa che i pol nar tociar sui sparagni privà co ste manovrete, che fralaltro pì vanti i pol far pasar, in periodo eletorale, come taji ale tase (dal 12.5% al 2%), anca se in realtà i xe drio far casa.

Inevitabilmente però sta politega la ciama vendare e a on sbasamento del valor dele asioni. Se prima n’investitor no’l spostava schei par via del costo de 12.5%, deso el ga incentivi a portar via schei verso mejo investimenti co costi fiscali minimi. Tanti sparagnadori no i sa dove voltarse, ma rento ogni bancheta ghe xe diversa xente sgaja co milioni che i sa ben dove portar el proprio capitale. Sta chi xe la prima raxon par cui el valor dele asioni el narà xo par colpa de sta raxon: aumenterà le richieste de vendita de asioni. La seconda raxon par cui el valor dele asioni el xe artificialmente alto, xe parché le perizie probabilmente le tende masimixar la tasa del 2% (pi alto el valor, pi alta la tasa) portando el valor su carta tenporaneamente alto.

In concluxion la banca ghe perde, parché inevitabilmente i perderà capitale. Se la banca decide de cronpar ela le asion vendue a xe na perdita neta. Anca se i cata altri investori privà (o soci fedeli) che i cronpa, inevitabilmente i cronpa a manco, portando xo el valor asionario.

L’investitor invese el se cata de fronte a on dilema. Consapevole che el valor dele so asioni el narà xo par via de sta manovra, ghe convien vendare o no?

A. Se se ritien che el calo de valor el sarà marginale, alora no convien vendare (e a sto punto gnanca vantajarse del 2%) e star chieti.

B. Se se crede che ghe sarà on calo consistente (anca se tenporaneo), alora convien asolutamente vendare. Vendo a 300 e caxomai riconpro a 290 (asumemo al neto de costi de transasion, se no, vedi A.) Ma pago 2% e vendo, o vendo prima a 12.5%?

B1. Dipende dala situasion dela banca. Se se prevede on calo consistente, preferiso anticipar el marcà e vendar deso pagando el 12.5%. Vendo a 300, pago 25 de tase e incaso 275. Mejo che catarme in ritardo co el valor dele asioni de xa a 275 o manco.

B2. Pago el 2% e vendo. Però ocio, parché i te dixe che te ghè da acetar entro fine mexe, e la xe na oferta SOLO par le banche no cuotà sul marcà. Chisà parché? Tante banchete locali da Novenbre fin Febraro gnanca te da la posibilità de vendar. Donca, se se riese pagar el 2% e vendar entro Otobre a xe la solusion otimale, ma pol capitar che i te risponda che al preso domandà no se ga catà chi ca cronpa e de riprovar co altro preso a…Marso!

In concluxion, el crupier (el stato) vinse comuncue e tira vanti cualche altro mexe; le banche picenine le ghe perde, no le pol esar contente de sta roba; l’investitor…A, B1 o B2. E l’oco chi xelo? L’investitor oco sarà cuelo che el paga el 2% deso, no i ghe lasarà vendar fin primavera, e dopo se catarà on preso de asion a 260. Saria sta mejo B1, elora a oportunità persa no vende gnanca. Intanto ghe ga regalà 4000 euri al stato.

Filipo Dal Lago

If you liked my post, feel free to subscribe to my rss feeds