PLEBISCITO.EU | PNV. Press News Veneto

Łasemo in Italia i bałisti deła lega, naltri veneti tołemose ła nostra indipendensa

In sti dì a xè vegnùa fora la notisia dela cuestion morale nea Lega Nord. L’aresto de David Codognotto, asesor leghista a S. Michele del Tagliamento, xè soło l’ultima notisia de na triste serie dopo le scualide aventure de sfrutamento deła prostitusion del’ex sindaco leghista de Silea Biasin, dopo le storie de tangenti de cualche tenpo fa a Nervexa, dopo le storie brute del bankier Blasi (presidente de CariVerona, su cui pende na rikiesta de rinvio a giudisio pa bancarota e tegnùo in piè dal sindaco leghista Tosi soło par farghe far el so buratin nełe recenti vicende de UniCredit, riusendo cusì a far dimetar Profumo).

E sensa dixmentagarse łe vergognoxe vicende deła CrediEuroNord, in cui ła Lega ła gà fregà na barca de schei ai so militanti e i famoxi vilagi-trufa in Croasia, co intaresi familiari del steso Bossi  far da vołan a altre roberìe da republica dełe banane leghiste.

Xè insoma evidente che ANCA Lega Nord ła xe diventada un partito tałian, al pari de tuti st’altri.

No ła gà gnisuna imunità rispeto al’anbiente połitico tricołore, che gà uno dei pì alti tasi de corusion al mondo, al pari soło dełe pexo ditature sudamericane o dei regimi axiatici.

Anca co ste tristi vicende de scualida cronaca nera-giudisiaria, naltri restemo parò convinti che el tradimento pì grando che ła lega gà fato nei confronti dei Veneti el xè cueło połitico.

Anca se fa schifo constatar che łe tangenti xe de caxa anca tra i pasdaran padani, ła roba pì grave xe che i ne gà svendùo połiticamente pa un piato de faxoi.

Sti maledeti infati i ciapa i voti ki prometendo mari e monti (federalixmo, schei, infrastruture e vanti cołe bałe che i ne conta da 20 àni), sigando slogan da ostaria contro Roma ladrona, ma dopo a Roma i ghe va far afari e che afari!

Ecuel che xe pexo, sensa portar caxa gnisun rixultato.

In 20 àni de buxìe ła Lega cosa gała portà de bon e de concreto ai Veneti?

GNENTE DE GNENTE, MA PROPRIO GNENTE.

Ansi, a dir ła verità a stavimo mejo co ła Lega Nord no ła ghe giera. Come veneti gavemo perso potere d’acuisto e libartà economiche e individuałi de baxe da cuando sti pori grami i se gà insedià al potere a Roma.

Parafraxando insoma na nota fraxe rivolta ai Yankee, a podemo ben dir, ansi sigar: PADANI, GO ROME!

Ste pur a Roma cari Padani a far łe vostre sporcherìe, ma łasene łibari naltri veneti de crearse el nostro destin de VENETO STATO, INDIPENDENTE.

Naltri veneti a vołemo un stato co na tasasion al masimo del 20% sul redito, degna de un paexe civile, co libartà de espresion, sensa pregiudisi rasisti, omofobici, rełigioxi, o de pensiero, co libartà de inprexa, sensa burocrasia, co regołe poche ma ferme, sensa l’aparato infernal de controło sovietico meso in piè dal’Italia pa giustificar el so fałimento storico, ła so inconsistensa nasionałe e co l’unico scopo de tegner naltri veneti e st’altri popołi sotomesi soto paròn.

Un Veneto Stato moderno e eficiente, rispetoxo e giusto, libaro e serio, ndoe ogni individuo veneto el posa vivar ben, fiero de esar veneto.

Gianluca Busato
Press News Veneto