PLEBISCITO.EU | PNV. Press News Veneto

Sto articolo lo scrivo in lengoa veneta, dato ca el intaresa soradetuto a Veneti sensibili ala identità veneta, ai altri gnanca serve far sti discorsi tanto i xe insupà come i fuse rento el matrix.
A me despiaxe parché rento sto testo sia pur breve e sia pur scrito da on semianalfabeta de economia fà a son mi, a credo, tegnendome inbon, de dar nodemanco on contributo speculativo so le potensiali tendense de bananarepublic.

Parlo donca a sta minoransa, parché de minoransa se trata, ca la varda a la Italia come a on baracon pronto a capotarse da on dì coelaltro. Invèro mi no penso ca el baracon ‘l se invirgolarà tanto in presia. E vago spiegarghine le razon.

Uncò come uncò la Italia la ga sta situasion finansiaria: on debito de pasa euro 1800 miliardi, on PIL ca st’àno forse el ndarà intorno ai euro 1300 miliardi, co na cresita de 1% (contro la inisial previzion de 1,7%). El problema contingente de el governo el sarà coel de no finir masa in deficit, ovèro la difarensa tra skei tirà in tase e skei spandhesti fora in spexe pioveghe. Sto fatore, el deficit, come ne pode insegnar mejo el prof. Pizzati, el xe critego inte la computasion de la plauxibilità de sostegno de el debito de on stato, datoca el indica la mancansa de coverdura, specie quando la percentual la supera certe soje dato ca la difarensa podaria deventar dificile da colocare. Come se coloca debito a penso lo sapia tuti, ma lo vago a riepilogar in breve: se fa emetendo titoli o boni de el texoro (ex. BOT, CCT, BPT, evc.. — evc.. no xe on titolo, ma vole dir “e via corendo” 🙂 — ).
Deso, d’altra parte se se cata inte na situasion embarasante, dato ca podaria eser fadiga far na emision de titoli e coverxar cusì el buxo. Ma i artisti ca xe al governo i ga altre rexorse: tirar skei in tase co metodi strarodinari.
On de coesti el xera stà mensionà in sto articolo, ma ghe ne xe altri, par exempio scurtar le finanse parà a le scole. Dovì par exempio savere ca le scole no le farà gite scolasteghe, e se le se fa le ga da eser finansià dai studenti, e in pì i insegnanti ca ghe và drio i gavarà da pagare (si gavì leto ben) el viajo (e oviamente no i sarà pagà par fare i gitani). Altro metodo el xe coelo de cavar via i pagaminti ai dependenti de le cooperative de lavoro temporaneo. Coesta la xe la trovata tra le pì incredibili, anca parché par proteger a oltransa tuti co el art. 18 (de facto impedimento de el licensiamento) par tutelare chi zà de tutele ghe ne gà da trar via, xe stà creà la categoria dei “precari”: zente ca no solo ciapa manco, no la ga gnanca la coverdura previdensial (vedar le recenti dichiarasion de el diretor de la INPS) e in pì la xe a la mercè de ste cooperative.
Le cooperative le xe organizasion par el lavoro dependente fate da personaj ca i le para vanti come imprexe. Ninte de male in coesto, se no par el fato ca la bona majoransa no i asume i dependenti, ma i li fa deventar soci. In sto modo se gira torno a le restrision legali (iperprotetive par i proteti) creando na fasa de sotolavoradori ca i ga anca el status de “socio” …inculà mi voria zontar. Ma coesto xe gnente. Ste cooperative le fornise dependenti ai ospedali, e i ospedali no i paga. A ghe xe aretrà anca de 360 dì (si, lo so el xe on eufemismo, se podeva mejo dir on àno). Ste coop. le xe ai feri cuti, strangolà da na parte da la mancansa de alternative de marcà, e da coelaltra da el monopolio ospedaliero moroxo. Gnanca dirlo, a farghine le pezo spexe i xe i lavoradori de ste cooperative, i vèri ipersfigà de la situasion. E kive el sercio el se sera: a indur in sta situasion le xe le presion de el governo ca el ga da rancurar su skei in tuti i modi, e soradetuto spelandoli via ai citadini ca li ga.
El scomisa dai pì sfigà, coeli ca no i xe gnanca boni de capire ca i xe drio incularli.
Dopo i và vanti co i borghexi (ex borghexi oramai), specie i vecioti ca i pol circuirli mejo co “proposte aletanti”.
Se ga da saver difati ca la Italia la xe la sede de grosi capitali privà inte le man de veci, skei ca i gavaria da pasar de man in eredità ai fioi, ma ca el governo stà sercando de magnar fora in tuti i modi.
No vien mesa na tasa de sucesion parché coesta la incidaria soradetuto ai pì siori, ca i xe i omeni sentà so la tola de le leve, ma co stratagemi vari.

Concluxion, chi stà a spetare el rabalton de bananarepublic el pode spetar on bel toco, parché a ghe xe ancora masa polpa da magnare, e na masa de persone tegneste al scuro de la vèra situasion in cui i se cata (e i se catarà) e anca bastansa sotomese e incapaci de organizarse par protestar.

Claudio G.