Ogni àno l’Italia roba ai aluvionà 4 miliardi de euro, sui 14 miliardi che i paga de tase!

Visualizza Alluvione Veneto 2010 in una mappa di dimensioni maggiori
Mapa aprosimativa del’aluvion in Veneto, creà da Saint Andres

Sula dramatica situasion dei aluvionà veneti continua el silensio asordante dei media taliani e dele istitusion de un stato nemico interesà solo che ai nostri schei.
La xé na autentica vergogna, cusì come xé na vergogna l’ategiamento dei “politisi” veneti, a scumisiar dai leghisti che in cuesto i xè i canpioni spudorati, che i domandà la carità a Roma col capeo in man.
Ma come se fa a domandar la carità, co che i schei i XE’ NOSTRI?

Na prima valutasion mostra come che i 131 comuni aluvionà i paga ogni àno de tase al stato talian 14 miliardi de euro. De sti 14 miliardi, 3 miliardi i vien restitui come trasferimento a region e enti locali, mentre 7 miliardi li vien dikiarai come spexi dalo stato come quota parte relativa ai comuni aluvionai (anca se secondo le nostre valutasion la spexa del stato Italia reale imputabile par quota parte ai comuni aluvionai la xè al masimo de 2,5 miliardi).

Anca tegnendo bone ste cifre dikiarae dal’Italia, manca sul piato almanco 4 miliardi de euro ogni àno, che vien robai ai comuni aluvionai e ai pori veneti soto acua e coverti dal fango.

Alora se domandemo come che se posa domandarghe a sti pori cristi, che paga el furto continuà e agravà del’Italia, de pagar deso le tase pal colabrodo de un stato maledeto. Come se fa digo mi a d0mandarghe a chi che gà perso tuto de pagar l’iva al 20% par mantegner sti maledeti cancarasi? Come se fa a domandarghe a chi che no gà pì la caxa o la so atività de pagar el 70% de tase su cueo chel gà guadagnà (e magari perso soto acua) nel 2010? O come se fa a domandarghe de pagar el “pizzo” al stato Italia-Mafia lasandoghe i 2/3 de cueo che  i guadagnarà da ancuò in avanti, sotraendoghe le risorse pa ricostruirse un futuro dopo na disgrasia cusì granda.

Ma se rendemo conto dela mafioxità del’Italia? Dela so natura de parasita che par continuar a existar el gà da robarghe anca a chi che gà perso tuto?

Existe na sola solusion a tuto cuesto, la se ciama VENETO STATO INDIPENDENTE.

E da deso existe anca Veneto Stato, un partito grando che porta vanti sto obietivo co determinasion e gran preparasion. Un esponente de gran rilievo el gà aderìo a Veneto Stato do dì fa. El leader del movimento de 450 sindaci che domandava de trategner el 20% del’irpef ai comuni. Antonio Guadagnini, vice-sindaco de Crespan del Grapa, el gà portà vanti la so batalia co determinasion e coinvolgendo un cusì alto numaro de aministratori, sercando personalmente de sfondar el muro de goma del stato talian. Dopo sto percorso, el se gà rexo conto del’inposibilità de otegner gnente dala bestia statale italiana e el se gà convinto che l’unica strada xe cuela de alsarse in piè come veneti e de torse la nostra indipendensa da soli.

No ne serve l’autorixasion de gnisuni, tanto manca dele cariatidi politiche italiane. Ne basta solo el consenso dei Veneti, par xontar el novo Veneto Stato indipendente al novero dei 200 stati sovrani al mondo, triplicai in numaro dai 74 chei gera nel dopoguera. Ne basta solo che la creasion de na nova clase dirigente onesta e preparada, che xe drio esar alevada con gran cura proprio da Veneto Stato.

L’indipendensa la xe un proceso natural e spontaneo nel mondo globalixà da ancuò. E manchemo solo che naltri veneti al’apelo. Par poco ancora!

Gianluca Busato
Press News Veneto