PLEBISCITO.EU | PNV. Press News Veneto

Cavà da Venet.net

Do Paexi difarenti co do crixi de debito de orijine difarente: ghe vołe do difarenti sołusion.

Ma ghe xe anca dełe somejanse deła crixi irlandexe co ła crixi greca de l’inisio de ‘st’ano.

Tute do łe tira in bało Stati de l’area Euro co grosi deficit che inisialmente i gheva visto che i tasi de intarese so i debiti i creseva a cauxa dei grandi deficit, ma dopo ła cresita dei rendimenti ła ga ciapà na strada tuta sua, in sałita. El aumento inte i tasi de intarese el xe stà da lu lu soło visto cofà el motivo de l’aumento dei rendimenti (visto che crese el riscio sentìo de default), roba che la ga ałimentà ła cresita ulteriore dei rendimenti, e via cusì.

Ma ghe xe anca difarense:

Una ła xe che ła crixi greca ła coinvolxe na mała aministrasion fiscałe de longo termine co co dei deficit sistemategamente alti, anca duranti i periodi de vache grase; invese ła crixi irlandexe ła xe un caxo de boła ediłisia che ła xe driuo crearghe grosi problemi al sistema bancario. Defati, in realtà l’Irlanda ła jera in surplus de bałansa de Stato durante el boom, anca se ocor tegner in nota che ‘sto surplus l’era urtà anca dała boła imobiłiare.

Na difarensa che ła xe cołegà a ‘sto discorso ła xe che l’ano pasà l’Irlanda ła gheva un liveło de debito soto la media europea (del 65,5% contro na media del 79,2%). ‘St’ano forse el gran deficit el portarà alto el debito, magari sora ła media europea, ma senpre manco deła Grecia e de altri Stati.

Na tersa difarensa ła xe che dove che el groso del deficit greco el xe struturałe, cueło irlandexe de ‘st’ano el xe in fondo soło un fatore una tantum, par colpa dei bailout (salvataji) ałe banche. Donca bio’ dir che anca sensa austerity o recupero, el deficit irlandexe el se riduxarà da so posta ała granda inte i prosimi dani, cuando che se finirà ła ricapitałizasion dełe banche a riscio.

In realtà, ła storia ła ne mostra che i salvataji dełe banche no i xe na spéxa e basta. Speso, o dixaremo inte ła major parte dei caxi, el pì dełe spéxe el torna inte’l tenpo che ła banca ła se risistema. E cuesto el vołe dire che el deficit irlandexe el podarìa ridùxarse in presa asè.

Na cuarta difarensa ła xe che l’Irlanda ła ga de pì da pèrdare da un pacheto de aiuti dal FMI e da l’EU. In Grecia no se prexenta el problema de asetar ‘sto pacheto de aiuto, parché tanto łe mixure de austerità le jera de bixogno isteso (anca se ghe xe da dir che el governo greco el ga pontà masa so l’aumento de tase e masa poco so i taji de spéxa) e soratuto ghe se xbasa i costi de prestito. Ma se anca l’Irlanda la ga de bixogno de mixure de austerità (preferibilmente taji de spéxa) e ła połe xbasare i costi de prestito, ghe xe isteso el riscio che altri Paexi de l’EU i meta ai aiuti ła condision che l’Irlanda ła alse ła tasasion sora i rediti societari.

Na tasa de ‘sto tipo probabilmente no ła aumentarìa, ansi ła riduxerìa el getito fiscałe del Stato irlandexe, visto che łe conpagnie multinasionałi che łe ga sede là łe perdarìa intarese a star in Irlanda, e se riduxarìa anca i investimenti reałi sol posto. Ma ‘sto aumento de tasasion irlandexe probabilmente el portarìa a un aumento dei getiti fiscałi de altri Stati EU, e xe par cuesto che i urta l’Irlanda verso ‘sta strada.