Ridicoło e ofensivo el stansiamento deła region Veneto ai poareti soto acua

La region Veneto ancuò ła gà decixo de stansiar 2 milioni de euro a favor dei aluvionati veneti. Uno podarìa pensar che la xe na roba granda, un intervento umanitario straordinario, degno deła grandesa del “nostro” goernator.

E invese no. El xe un intervento da peocioxi. Peocioxi che dopo ver tegnùo el saco in man ai ladri del stato talian, deso i se fa bełi co do schei de elemoxina.

Ma se rendemo conto che i dà 2 milioni ai poareti che magari i gà perso tuto e che xe disperai, cuando che senpre ancuò – come ieri e come doman – i ghe ne gà robà 50 de milioni de euri a tuti i veneti?

Ladri małedeti, ła pagarè un dì, prima o dopo, pa el vostro tradimento grando verso el vostro Popoło.

Pensemo che proprio ancuò, dopo 219 dì pasai dal’elesion de Zaia a goernator, l’Italia ła gà xà robà ai Veneti 12 miliardi de euro tondi tondi.

E i ne dà 2 milioni de euro? E i taca i so tg vergognoxi parlando de “maltempo al sud”?
Ma cuanto bechi e bastonai semo naltri veneti?

Cuanto ne vol a capir che solo co l’indipendensa podemo farse i nostri intaresi e salvaguardarse el nostro futuro?

Binbari deła Buxa