PLEBISCITO.EU | PNV. Press News Veneto

Cavà da Venet.net

Assange “omo de l’ano” nte i prexepi de Napołi

El Fondatore de Wikileaks Julian Assange sarà anca da soło inte na prexon de Londra, ma ‘nte i tradisionałi prexepi napołetani de Nadałe l’è in bona conpagnia co Jesù, Maria e Jiusepe.
Assange, che xe raprexenta’ co’l so’ imancabiłe laptop, el xe sta’ crea’ da Gennaro Di Virgilio, che ogni ano deside de creare almanco on personajo contenporaneo da metare visin ałe tradisionałi figure del prexepio.
“Go conprexo anca łu pa’ far divertire on poco el mondo”, ga dito Di Virgilio, 29 ani. LLa so famejia fa statuete de prexepi a man dal 1830.
Nei ultimi tenpi, i artisti e artijani che fa prexepi napołetani łi ga doparađi pa’ raprexentare i sinbołi dei tenpi.
“‘nte na serta maniera, Assange xe l’omo de l’ano”, ga dito Di Virgilio, paron de on minuscoło negosio fra i tanti so na streta stradeła de Napołi noma’ Via San Gregorio Armeno, speciałixa’ in statue de Nadałe, prexepi e ciavexełi tuto l’ano.
Ghe xe soło na copia deła statueta de Assange, che costa 130 euro. Di Virgilio dixe che’l ghe ne farà altre a richiesta.
In conpenso parò ghe xe raquante copie de statuete del premier Silvio Berlusconi che i ‘taliani połe metare neła mangiatoia co’ ła Sacra Famejia, i Magi, el bove e łe piegore.
Sto ano, ła crixi dełe scoase deła sità meridionałe xe deventa’ on tema comun pa’ artisti e artijiani de sta stradeła, che ła xe larga ‘pena tre metri.
E xe cusì che ła Madona, San Jiusepe e anca ‘l putìn Jesù ghe ga tocà metarse łe mascarìne pa’ protejarse dal tanfo dełe scoase dełe strade de Napołi.

ŁA CRIXI DEŁE SCOASE IN MINIATURA

“Vołevo far capire che ła xe na provocasion par quełi che ne governa. No penso che sìe beło metare i sachi dełe scoase nte’l prexepe visin al putin Jesù, ma jera necesario”, ga dito Di Virgilio.

“Gavevimo da far pasare sto mesajio”, el ga dito.
El mexe scorso l’Union Europea ga dito che l’Italia podarìa tocarghe multe pexanti, parché no ła ga rispeta’ na sentensa deła Corte Europea so’ła crixi cronica dełe scoase Napołi che ga łasa’ tonełate de mondisia pa’ łe strade deła sità sto ano.
Ła crixi xe on poco mejorà e ła magior parte del sentro storego xe torna’ ała normałità. Ma enormi montagne de scoase jera uncora samenađi pa’ łe strade dei quartieri periferici.