PLEBISCITO.EU | PNV. Press News Veneto

Sto articoleto curto aparso su LaVoce.info (blog de economisti gestio dala Bocconi) la dixe longa.

La crixi mondiale, partia verso meta’ del 2008 e dura’ par tuto el 2009, la xe uficialmente finia. La xe finia parche’ el groso dele economie mondiali le xe torna’ ai tasi de cresita pre-crixi. La Germania difati la xe torna’ a ritmi de cresita mediamente del 3%, in media col groso dei paexi europei. El grafico mostra anca che la Germania la ga coerto tuto el tereno perso in do ani de crixi e de sto paso la tornara’ su la trajetoria pre-crixi.

Anca par el stato talian la crixi mondiale la xe finia e difati anca l’economia taliana la ga ritaca’ cresar ala so media pre-crixi. Solo che a diferensa de staltri paexi ITA la crese del 1% scarso, proprio come che la ga fato nel decenio precedente ala crixi. Insoma, xe finia la crixi mondiale ma xe rimasta tale e cuale la crixi totalmente taliana.

De sto paso l’economia la tirara’ anca vanti, ma rispeto ai vicini europei i citadini rento el stato talian i deventa relativamente senpre pi poareti. L’economia tirara’ anca vanti, ma de sto paso i conti publici del stato talian i deventa insostenibili parche’ no ghe xe on taso de cresita suficente par suportar el debito publico pi alto d’Euorpa.

El parche’? El stato talian rende le ativita’ economiche che opera rento sti confini pi ineficenti e manco conpetitivi. Le ragioni le xe multiple: giustisia orenda, presion fiscale da fogo, burocrasia… tute robe documenta’ dai ultimi posti in clasifica che el stato talian riseve dai vari oservatori internasionali.

Solusion? Veneto Stato Indipendente et no se pol far de manco.

Lodovico Pizzati – Segretario Veneto Stato