PLEBISCITO.EU | PNV. Press News Veneto

El 25 de Marso a xe storicamente considera’ la data de nasita de Venesia, e difati ieri la nostra capitale la ne ga conpiu’ 1590 dala so fondasion ntel 421 d.C. De recente el 25 Marso xe sta anca dichiara’ festa del popolo veneto, e de sicuro ieri i veneti i se ga fato proprio sentire.

Solo Veneto Stato gaveva do eventi ntel teritorio: uno a Bovolone (VR) co on sentenaro de prexenti, e naltro a Fanzolo (TV) co na setantina de prexenti. Ma mentre Veneto Stato bateva sul ciodo politego, sotolineando le tante ragioni economiche che gavemo come popolo par cavarse fora da sto paltan talian, a Venesia ghe xe sta na grandisima prexentasion, na espoxision storica, identitaria, culturale, ciamemola come che volemo, ma che ne ga ricorda’ chi che semo, oltre i numari e la politega.

Al Telecom Future Center in canpo San Salvador a Venesia, el Prof. Borsetto el ga fato el pienon co na partecipasion de oltre doxento (200) veneti che xe vegnu’ a scoltar na prexentasion su Marcantonio Bragadin, proprio in ocaxion del conpleano de Venesia. Xe sta emozionante scoltar i eventi dela difexa eroica del Bragadin e de cuel che ghe ga’ toca’ subir pa’l so sacrificio. On sacrificio de pochi sentenari de veneti che ga tegnu’ bota co sentenari de mejari de turchi, permetendo al resto d’Europa de organixarse par la pi inportante bataja del scorso milenio, la bataja de Lepanto, dove che se ga riscia’ le sorti de l’intiera civilta’ ocidentale.

On grasie particolare al prof. Borsetto par ver rievoca’ le gesta de sti nostri veneti, trasmetendo l’intensita’ del sacrificio, e conbinando la serieta’ de sti eventi co no stile anca sdramatixante e coinvolgente.

La consapevolesa de chi che semo e da dove che vegnemo resta senpre l’ingrediente fondamentale dele nostre aspirasioni e dela nostra determinasion.

Lodovico Pizzati – Veneto Stato