PLEBISCITO.EU | PNV. Press News Veneto

Tolto da Venet.net

Mentre el federalismo italo-padano el portara’ pi tase ai pori veneti, eco come che funsiona on paexe realmente federalista.

Twitter ga cualche sentenaro de dipendenti e xe baxa’ a San Francisco. Sicome che a San Francisco i ga na tasa locale de contributo sociale (su ogni dipendente) del 1.5%, alora Twitter a xe drio pensar de emigrar a Brisbane, CA (che xe diexe chilometri pi a Sud de San Francisco) par sparagnar cuel 1.5%. Semo drio parlar de conpetision fiscale no fra stati difarenti a l’interno dei USA, ma de conpetision fiscal fra comuni rento el steso stato che forsa el ribaso dela presion fiscale.

Par no perdar Twitter, San Francisco ga rilancia’ proponendo a Twitter de cavarghe sta tasa se se sposta invese nte on cuartier de San Francisco da revitalixar (el tajo fiscal vale anca par altre dite che vol spostarse in sto cuartier). La consiliera comunale che xe drio portar vanti sta proposta la ga dito che “la xe filoxoficamente contraria a sbasar le tase”, ma la xe costreta apunto par via de sta conpetision fiscale. Morale dela favola: el sistema federale forsa i politici a sbasar le tase e eser pi eficenti co la spexa publica, anca se de natura ghe piaxaria spender e spandar.

Cuesto xe el poter de decentralixar el potere politico nte on sistema veramente federale. Ani luce dala riforma centralista che xe drio pasar la lega.

Lodovico Pizzati – Veneto Stato

La mejo posibilita’ che ga San Francisco par prevenir che Twitter emigri verso sud a xe drio  afrontar on voto critico mercore par vedar se darghe a sto servisio de micro-blog on tajo fiscale de sie ani.

La dita in cresita  e baxa’ a San Francisco la xe drio considerar de spostarse a Brisbane [a diexe chilometri pi a sud], dove che el costo del business el saria pi baso. San Francisco la ga na tasa de contributi sociali del 1.5 percento mentre Brisbane no la ga mia.

La supervixora Jane Kim, dela municipalita’ che contien el cuartier de mexo Market Street dove che Twitter podaria spostarse, la ga taja’ dala poxision del so predecesor Chris Daly e la xe drio urtar par el pasagio de na legislasion che daria a Twitter on tajo de contributi sociali par sie ani se el decidese de movarse nte l’edificio a l’incroxo fra le strade de Market e la Nona. El tajo fiscal vegnaria aplica’ a tuti cuei business cualifega’ che vol spostarse in sta porsion del cuartier Tenderloin e del mexo Market Street che i funsionari dela cita’ i vol revitalixar.

“A son filoxoficamente contraria a tajar le tase,” la dixe la Kim luni. “Me ga toca’ pensarghe sora par longo e fiso. Sto chive xe pitosto finalixa’. A xe bastansa specifego. A xe bastansa curto.”

Portar sta legislasion traverso la giunta a xe on groso test politego par la Kim, che la se ga indarenta’ in Xenaro.

Sto mercore, la legislasion, che la ga genera’ critiche da fasioni politeghe pi progresiste de San Francisco, la xe de fronte el comitato de bilancio e finansa par la so prima seduta. Se aprova’, la giunta intiera la podaria tor na decixion xa la setimana che vien.

La Kim la dixe che la ga esposto le so considerasion ai so coleghi.

El supervixor John Avalos el ga dito che la proposta no la par mia masa coreta data la fadiga finansiaria che xe drio far i rexidenti del so distreto.

“Chi xeli i investitori [de Twitter]?” el ga dito. “Probabilmente alcuni dei pi richi de sto paexe.  E semo drio darghe ncora pi richesa.

La Kim la dixe che la ga in mente de amendar la legislasion mercore par “scurtar” l’area de exension fiscal par asicurarse che vegna coinvolte solo i ixolati co na longa storia de abandono.

On report da on analista de bilancio Harvey Rose el ga tira’ fora dele preocupasion su la posibilita’ che la cresita de laoro da Twitter la sipia manco del previsto. La sita’ la podaria ver pi dificolta’ nel portar servisi pi eleva’ “par rivar ale domande de na dita granda e nel fratenpo ridur le entrate dai contributi sociali.” La sita’ e Twitter i ga negosia’ par ver pi servisi tipo pi polisia nel cuartier e na linea de bus espresa.

“Nte na maniera, sta legislasion la xe on salto de speransa,” la ga dito la Kim. “Ma ghe xe sta talmente tanti tentativi de revitalixar el mexo Market e nisuno ga funsiona’. Gavemo da proarghe anca co cuesta.”

l’uficio de contabilita’ dela sita’ prevede de dar fora on report su l’inpato economico de sta proposta anco’