PLEBISCITO.EU | PNV. Press News Veneto

“Il Gazzettino” el ga metesto sol web on sondàjo a ndo se ga da votàr so chi ca xe dacordo darghe suporto al studente asà càxa da scòla o al profesòr ca el proibise parlàr Veneto scòla. In pràtega, sto sondàjo el xe finalixà vedar chi ca xe favor e chi ca xe contro la Lengoa Veneta.

Prima ròba xè asurdo dar raxòn a chi ca proibìse parlàr la so Lengoa st’altri, e xà chìve el jornàl el ga xbalià far el sondajo.

Segona ròba, al sondàjo partesipa chi ca parla Veneto o ànca foresti ca no lo pàrla? Parche a sto pònto ne vien spontaneo dimandarse: “ma i Sloveni co i ga festo el referendum pa la independensa, gali invità anca tuti st’altri Jugoslavi votàr?”. A sémo solo naltri Veneti sernir de parlàr o no parlàr Vèneto e no xe na chistiòn ca ga da sernìr i Pulitani, i Toscani, i Taliani o i Scosexi. E pi ncòra la xe na libartà individuàl tutelà dai tratà internasional e tute le costitusiòn. Co sta filoxofìa (pseudodemocratega) i ga etnosidià mejari de Pòpoli. I Sardi sernise par lori fa i Vèneti sernise par lùri. Ve pararìselo onesto ciamàr 1500 miliùni de Sinìxi ca li sernisa sa i talini li ga el dirito de parlàr taliàn o Ingléxe?

Terso, a no semo dei martùfi, e ne ronpe el chitarìn catàr fòra (salvo erùri) ca el sondajo del Gaxetìn el xé trucà e i nòmari del rixultà no li ga gninte ca vedar co i vostri vòti sol web. Pa controinfenociàr el progràma del sondajo sol web, a xe sufisente ndàr rento na cartela del vostro computer e cavàr i cookies ca segnàla ca gavì xà votà, in sto mòdo podì capir sa el progràma del sondajo el xè onesto.

Par cosa falsàr on sondàjo? Parchè se fa crèdar a ona o st’altra parte ca si na minorànsa e xbaliè. El xé on mecanìxmo sosiopsicolojego. Le parate militàr, le manifenstasiòn oseàneghe, i progràmi tilivixivi co i teàtri inpienà o la xènte ca aplàude li ga la funsiòn de farve sentir ca si col branco, co la majorànsa, in pràtega ca si da la parte justa e no si sùli.

Raffaele Serafini
Veneto Stato – Marostega