PLEBISCITO.EU | PNV. Press News Veneto

La nova la xe stà sbalotà da na parte a quelatra de el pianeta, e ramai la savaré anca valtri: Osama Bin Laden el xe morto. No se podeva cavarse da el parlarghine anca qua in sto infoblog. Prima la cronaca.
Sta matina presto (par la ora americana) el prexidente dei USA Messer Obama Barack el ga rilasà na dichiarasion publica ndo el ne conta che dopo longo tempo de indagine el capo de la CIA lo ga informà che i gaveva individuà ndo se gaveva sconto Osama Bin Laden, el capo de Al Quaeda e, i ne conta, promotore de el ataco de el 11 Setembre 2001 ai USA. Lu come capo el ga da el ordine de ciaparlo o farlo fora, e co on ataco militare i ga asaltà el compleso ndo el se gaveva rifugià in Abbottabad, na cità piena de comodità a 75Km a nord de Islamabad la capitale de el Pakistan. La operasion la xe stà parà vanti da on commando de “navy seals” che i xera rivà co elicoteri so el posto, on dei elicoteri ga vesto on guasto mecanico e el ga dovesto leteralmente aterare sora el compleso abitativo. I seals i xe ndà rento, foto in man e i ga domandà se lu el xera Osama Bin Laden, quelo el ga risposto de Si, e alora i ghe ga domandà se el intendeva arendarse, rapidamente i ga realizà che no el voleva arendarse i ga avansà par ciaparlo e i ga sbarà, copandolo. Intel compleso, de proprietà de do dei fradeli de Osama BL, ghe xera do fameje ca no le saria stà injurià. I soldà i ga portà via el corpo, solo quelo de OBL, e i ga dà fogo/distruto el elicotero danegià par no lasare indrio materiale tecnologico de valore.
A sto punto i gavaria ciapà del material genetico par el controlo de el DNA, e secondo el rito musulman i gavaria dovesto sepelirlo intro 24 ore. Sicome Osama el xera saudita, i gaveva da portarlo là ma el governo saudita el ga rifiutà el rimpatrio, cusì i lo ga “soterà” in mare.
Questa la cronaca, in sintezi.

Deso, no vojo far el dietrologo e tantomanco el complotista, ma de securo i americani i ga de le fortune incredibili, proprio incredibili. Russia Today lo dixe sensa peli inte la lengoa e i titola: “trasparensa zero” so la operasion festa dai americani. Si parché Osama da àni no el se faxeva pì sentire, e ancora intel 2001 se saveva che el so problema de insulina lo rendeva fragile e i gaveva informasion che el gaveva seri problemi de salute. In veneto se dixe “chi no more se rivede” che vale anca el contrario. Xe incredibile el posto ndo i lo ga ciapà. Na cità ndo a pochi pasi da el compleso ndo i gavaria ciapà OBL ghe xe la academia militare packistana, e ndo la stimana pasà el prexidente el xera stà in vixita. Na cità incastrà sensa vie de fuga, e circondà da militari. Xera OBL armà par ver oposto rexistensa al punto de no poderlo arestare? De questo no se parla e le foto mostra solo mace de sangue inte na camera da leto, e del trambusto inte la stansa. Fortuna vole pure che ocora far sparire el corpo intro 24 ore par oservare el preceto musulman, e fortuna de le fortune i sauditi no i lo vole per cui otima solusion xe coela de fondarlo in mare.
Cusì mai nisun sarà bon de controlare.
Insoma, no se voria far i dietrologi, ma tute ste combinasion le lasa perplesi.
Se pode eser de boca bona e bevarse ogni roba che se lexe e sente, se pode eser dei difidenti e no credar a gnente, ma se on justo mix de fiducia e criticità ne tien so la bona rota, alora de securo tuta sta asion poco documentà no la juta de certo a tegner zo la criticità.

In concluzion el efeto finale el xe che i statunitensi ga stabilio la partia e meso in ciaro: “nisun pode farla franca se el ne pesta su in caxa nostra”.
Cusì la fiducia dei americani che crompa oro par timore de el crolo de el dolaro, uncò i ga vesto on susulto de patriotismo vendendo el oro in masa e faxendo petar zo el preso de el metalo zalo. So sta onda emotiva ghe xe anda drio anca el petrolio. Na otima ocaxion par speculare so le emotività de el genere human.

Claudio G.