PLEBISCITO.EU | PNV. Press News Veneto

Sensa mexe parole, a xé òra parlàr ciàro, e vanti tùto ghe vol el coràjo de vardarse naltri e farse on bel l’exameto de cosiensa, sa no semo buni catarse i nostri difeti, de serto no ghemo el pasaporto pa delibaràr e verxar i òci de on pòpolo:chelo Veneto.

De còsa xéla malà na parte del Venetìxmo, che càncaro a xélo drìo rosegàrlo? Coala xèla la pèste ca la asìla na minorànsa dei nostri?

El VS (Veneto Stato) el ga pa statuto ciàri na sèrie de valori ca li riflete la dichiarasiòn dei dirìti de l’òmo. Le libartà fondamentàl pa i diriti sivili:la libartà lengoistega, la no discriminasiòn rasiàl, relijoxa, sesuàl, le xé dei caosaldi de la futùra sosietà Vèneta, dei Veneti, del Veneto Stato de tùta l’Europa e del mondo.

Epur, ghe xè fra serti Venetìsti la tentasiòn rinovàr vèci sentimenti ca no ne apartien, i stìsi ca prolìfega rento le fìla de chela Lega Nord vera nemiga del nòstro Pòpolo.

-Ve lo ricordelo co el sindaco de Trevixo el ga discrimenà i fenòci? On sciàpo dei nostri i ga vìo el coràjo de ndar in piàsa e sventolar el gonfalon in solidarietà ai fenoci discrimenà da on sindaco vèneto, leghista e rasìsta. Chel dì el gonfalon el ga sventolà co onòr egoàl a chelo de Lepanto e la stòria ne ritornarà sto onòr. Ghemo el l’òbligo de diféndar la diversità, de solidarixar co fenoci, co lexbeghe, co trans discrimenà. Sto discòrso el ga da èsar ciàro e xé òra de molàrla co la sesuofobìa rento el Venetìxmo. No semo Leghisti, no semo troglodìti serebrolexi co prejudisi ignorànti.

-A xé òra de molarghela co el ritornelo leghista ca se vede in bòca al sòlito Vèneto còntro l’imigrà. L’imigrà el xè na risorsa, el xè on èsar omàn ca bandona la so tèra parche disparà e xè disposto sacrifegarse. El foresto el xè na risorsa, el xé na richesa. A ne còmoda ca la badante Ukràina ghe nete el culo ai nostri vèci, ne còmoda ca el morèto el néte cèsi e scoàse o laore tiràr su le suche e i cocòmari so i cànpi? A ne còmoda ca sta xente paghe i contributi pa le pensiòn ca ciapèmo? Metemose al spècio e vardemo la nostra ipocrixìa. Basta rasìxmo, basta far la goèra al diverso. I nemighi nostri i porta l’oniforme da soldà ca invade la nostra tera, i porta la jaca e la craata da politego e rufiàn de ròma. I nostri vèri nemighi i xe live stipendià da la rejòn, da el stàto, da la provinsa e i serca deviàr la nostra atensiòn co la costrusiòn de nemìghi inexistenti pa sararne i òci.

-L’antiebraixmo el xé na piàga ca la infesta el Venetìxmo e la rìva intrufolàrse rento fin le fìla del VS a càùxa de indivìdui ignorànti manipolà da grùpi de drèta e da na propaganda costruìa ad hoc. Molemoghela infamàr el Liòn. Ricordemose ca le Venèsie, le xé sta la pàtria de Ebrei e Armeni, la patria de le libartà a ndo siensiati e edituri de mexo mòndo li podea stanpàr e profesàr co libartà. Chi ca ne propìna tuti sti mesàji antisemìti a xè i degni eredi de na dotrìna rasiàl sorpasà, chela stesa dotrìna nasionalista italiana ca la ga masacrà milioni de Libisi, de Etiopi, de Croà, de Sloveni, ca no li volea farse italianixàr. La xè la stesa piàga ca la ga oprimesto i Veneti, i Siculi, i Tirolìxi, i Sardi….la xè la stesa peste ca discrìmena chi ca parla Veneto, chi ca no el vol integrarse inte on modelo ònego globalixànte. Eco parche, fin de la fièra, comunìxmo e naxismo li xè la stesa sporcarìa, e li reitera i valuri infami del nasionalìxmo omojeneixànte. L’antisemitixmo fra i Vèneti el xè propio el ponto comùn e indicador de afinità fra ideolojìa comunista e fasista.

-L’antimusulmanixmo. Steso discòrso ghemo da fàr pa el rasixmo contro i musulmàni. Molemoghela de parlàr de goère sànte. Chi ca parla de goera santa vol dir ca el xé pi fanatego de on Talibàn. El intolerànte el xè drìo sto antisemitìxmo, sto antiebraixmo, sto antiislamìxmo. Molemoghela discriminàr. A xè infàme chelo ca fa la Lega Nord e chi ca ghe va drìo. No me pàr ca i musulmani li manche de rispeto gnisòn, ansi sa volemo dirlo, la cexa catolega la gode de privileji e status inpensàbili e pa capirlo a ne bàsta vedar el silensio de tute le istitusion so i càxi de pedofilia e resiclajo de schei da parte del Vategàn e i so adepti.

No volemo na sosietà de conpagni o de cameràti, volemo on mondo a ndo ghe xe libartà de pensiero, de stanpa, de internet. A ndo gnisòn el ga da èsar discrimenà pa le so idèe, el so color, la so credensa, i so gusti sesuàl, la so richesa, el so pasaporto. No volemo fanàteghi del nasionalìxmo, no volemo deventàr fa i taliàni, no volemo relijòn de stàto. El Venetixmo el ga da epuràrse, e chi ca crede de entràr inte el VS pa dopararlo fa piataforma contro i valori costitutivi dei diriti omàni, el cànvie tròdo, e el còra Pontìda, el catarà Bossi e company a bràsi verti.

Rafaele Serafini

Socio Fondatore de Veneto Stato