PLEBISCITO.EU | PNV. Press News Veneto

Raramente el sequel de on film el xe belo come l’originale. Par no parlar dei cartoni animà che i ga dei sequel da voltastomego. I caxi de cartoni animà co sequel de suceso i xe rari, e me vien in mente solo che la trilogia de Toy Story. Da ieri go da zontar anca Kung Fu Panda 2, che adiritura el xe mejo del primo. Ansi, el primo me ga piaso pocheto: bela animasion ma na storia co na morale bastansa banale, anca se condivixibile.

Kung Fu Panda 2 ga invese na trama pi avincente e se volemo anca pi profondo, ntei limiti de on carton animà. Ghe xe na interasion pare-fiolo su do piani, co da na parte la relasion del eroe (el panda) adotà da on oco, e da staltra del so antagonista (on paón) fiolo de on re. El paón el xera sta exilià da so pare (parche’ el xe on spicopatico genocida), ma el eredita el regno na volta morti i genitori (dela serie: el va al potere de dirito invese che par merito), e el taca col so piano de concuista dela l’intiera Cina. Fatalità chive ghe xe on paralelo co la vera storia de l’unificasion dela Cina, e dela atuale propaganda filmatografica del governo cinexe de glorificar la forsa de na Cina unia soto un inperatore, rispeto a l’alaternativa de ver tanti regni antagonisti fra de lori. Ma sto chive a xe on particolare che penso che i putei spetatori (e tanti dei so genitori) no i gapia mia captà, ma tanto no xe altro che n’aspeto secondario che contrapone el cativo paón megalomane che sogna el grande inpero, e el bon panda che’l difende l’indipendensa de ogni çità-stato (a difarensa dela vera storia cinexe, vinse el panda). [continua…]

L’aspeto prinçipale del film xe la contrapoxision dele do personalità. Da na parte el paón, fiol de on re, che ga tuto, ma che xe motivà da on rancore irisolto, on stato d’animo malmostoxo e na tatica de tramaci nte l’oscurità. Da staltra parte ghe xe el panda, adotà da on poro oco e che, come za visto ntel primo film, xe sta bon de otegner el so status de maestro de kung fu co tanto laoro e trasformando i so difeti (la pansa) nte na forsa (eser bon de atutir i colpi stisoxi de staltri). In Kung Fu Panda 2, se vien a saver che l’eroe el gavaria tute le bone raxoni de vendeta e de rancore, dato che i so veri genitori i xe sta copà proprio dal paón, ma se’l gavese conbatù co le stese arme del paón el gavaria perso. El panda invese el se inposesa de na tenica marsiale molto estrema, che domanda pero’ de aver na conpleta paxe interna. El so maestro Shifu ghe fa veder che co la paxe interna na giosa de acoa no la se smaltega mia sul corpo, ma la se pol deviar, mantegnerla nte la so forma de baleta moja, e dirotarla dove che se vole. El panda, na volta confrontà el so pasà de orfano adotà, l’aceta i torti che ghe xe sta fato e na volta otegnua la so paxe interna no solo el xe bon de deviar le balete de acoa, ma parfin le balote de canon che el paón ghe spara drio.

Solo co na paxe interna se pol sovrastar le aversità esterne.

Lodovico Pizzati
Veneto Stato