Cari Soci,
parlando al telefono o in riunion co tanti de voialtri me toca spiegar come che semo riva’ a sta inevitabile scissione che ghe sara’ el 23 otobre. Me son rexo conto ieri (co che me xero promeso de ciamar uno a uno tuti) che el punto de no ritorno el xe sta pasa’. Come segretario me asumo le me responsabilita’. Go parla’ co soci che asolutamente no i ndara’ mai a Vicensa (evito de darve le motivasioni chi par no far polemica), e ghe xe naturalmente chi che no ndara’ da nesuna parte ma a Vicensa. Insoma, se ga crea’ tre grupi, uno de cua’, uno de la’, e uno (de larga magioransa) che no ne vol pi saverghine. Xe on falimento par tuti, ma sora de tuto mio come segretario.
Dal 23 andaremo tuti par la nostra strada, ghe sara’ inevitabilmente inbarasanti confronti in tribunale e in televixion co do grupeti che rivendica la titolarita’ de nome e de logo. Ghe go rifletu’ e pultropo sara’ cusi’. Alora ghe tegnevo oltre che a rigrasiar tuti cuei che me ga scrito e ciama’ par darme el so suporto, volevo anca dir ai soci che no i me stima o che in cualche maniera i xe deluxi de mi, che mi ve vojo comuncue on gran ben e ve rengrasio par l’esperiensa fata insieme in sti 13 mexi de ativita’. Andaremo par strade separa’, ma so che co che se incroxaremo ghe sara’ senpre on senso de fradelansa fra de noialtri (basta no parlar de politega). Cuesto parche’ a fondo de sta scission no ghe xe problemi personali, come che cualcuno pol pensar, de sicuro no ghe ne xe fra mi e Giustino.
Alora, rivando al punto dela me letara ve ligo chive soto cuel che gaveo scrito el 28 setenbre al minor consejo. Ve la alego solo par informasion parche’ tanti me domanda le dinamiche. E ala baxe dele dinamiche no ghe xera asolutamente on acordo de rifar le cariche dopo on ano de ativita’.
On grasie de cor a tuti,
Lodovico Pizzati
Segretario – Veneto Stato
PS. Ghe go mola’ de far telefonate parche’ le faxevo solo nel intento de riusir far on congreso unitario in luogo intermedio. Deso che xe asicura’ che ghe sara’ do congresi ga poca inportansa far gara a chi che ga manco prexense. Ghe xe na fila de nove persone che sevita rivar, e xe cuelo che me da la carica par nar vanti anca in sti momenti molto dificili. Sento l’indipendensa che se avicina.
If you liked my post, feel free to subscribe to my rss feeds
Firma per il VENETO INDIPENDENTE!
I 120 Dogi della Serenissima Repubblica di Venezia
Iutane, fa na picola donasion!
Veneto è chi il Veneto fa
il pnv su facebook
twitter
Scottish National Party, SNP
BlogoSquare
Me xero desmentega’ el alega’. Eco la me letara al minor consejo del 28 setenbre:
Cari consijeri,
gavemo dele giornate de intensa ativita’, e el primo giorno disponibile par na magioransa de naltri (ma no tuti) de incontrarse par on minor Consejo xe mercore 5 de Otobre.
Come ODG ghe saria:
-preparativi potensiale MC (23 Otobre)?
-varie e eventuali (richiesta Salvador, proposta Guadagnini, esetara)
-altre robe che salta fora podemo anca votar online e caxomai discuterne
Mi pero’ go seri dubi su l’oportunita’ de far on Magior Consejo ntel mexe de Otobre. El motivo prinsipal par farlo xera de dar sta benedeta posibilita’ de modificar el statuto. Mi, l’unica proposta che go visto xe sta chela del 15 Zenaro, ala cuale come proposta de partensa ghe go fato le me critiche (tante) e go anca parecia’ do-tre mosioni su le robe condivixibili. Cuesto go fato ancora a fine Giugno, e da alora no go pi sentio gninte, ne visto proposte alternative. Mi credo che decider de far on MC sensa aver le idee ciare de che mozioni vegnara’ prexenta’ (e saver se ghe xe na intexa preliminare sule votasion) a xe iresponsabile parche’ saltara’ fora na marea de proposte come l’ultima volta.
Alora, se le intension del 5 de Otobre xe de convocar on MC entro fine Otobre, bexognaria saver za deso che proposte che ghe xe in giro. Se le proposte de canbiamenti le xe marginali (non de na urgensa cruciale), no so se ne val la pena parche’ co bona probabilita’ pena che verzemo on MC volara’ sicuramente le richieste de sfiducia. A ocio ghe xe na magioransa che vol rifar le cariche dei diexe de sicuro, ma credo anca che ghe sia na magioransa de consensi par rifar el minor consejo parche’ no’l xe raprexentativo del teritorio (e dela conpoxision atuale dei soci). Se femo on MC deso, probabile che sul statuto vien fora na cagnara (parche’ al momento no vedo nesun preparativo preliminare), e vegnara’ rifate le cariche dei Diexe e forse del mC, che a mi me despiaxe parche’ operativamente se pol nar vanti co sta scuadra fin a fine mandato.
Sti chi i xe i spunti de discusion par la convocasion del 5.
Lodovico
Te fasso i complimenti segretario. veramente un’infusione de otimismo che me dà la carica.
In merito al to alegato, sarissela na giustificassio a cossa? Al fato che te savevi che la xente gavarìa consegnà le dimission? Al fato che no te volevi fare un MC par no perdare el posto? No lo capisso, sarò ignorante ma no ghe rivo.
Se te senti de aver fallìo come segretario no te fe altro che acetare de fare un congresso – possibilmente quelo legalmente riconossùo magari – rimettendo el mandato ai soci. Cioè queo che un “politico” serio dovarìa fare. Cioè queo che ga fato i sgnori che se ga dimesso. Ah no, queli lo ga fato par na precisa strategia de zoghi de potere, i facinorosi! Ve fasso notare, giuso par smorxare e polemiche de le division, che queli che se ga dimesso xe sia ex veneti che ex pnv. Quindi, come go xa scrito, o i xe tuti mona o forse a spussa del marso se sente ben da tute do e parti. Almanco par queli che ga l’umiltà de snazare e no taparse el naso.
La to letara dimostra solo el fato che el casin lo gavì fato par rompare; a voialtri de fare un congresso no ve ne frega gnente. Un segretario de un partito che dixe ste robe con tono rassegnà. Sensa considerare el fato che no te ghe mai spiegà cossa che xe sucesso al mC famoso, limitandote solo a dire che el presidente se gaveva dimesso. Beh, almanco lu i COJONI par farlo li ga, nonostante i ultras lo stia dipingendo da un toco come un vecio bacucco.
E no sta dire che te ghe fato le telefonate par fare un congresso unitario. Se te volevi bastava parlarse col to presidente e so sicuro che gavarissi trovà na solussion che ndava ben a tuti. Le telefonate te le ghe fate par raccogliere voti da quei che jea al oscuro de tuto.
Bea figura ghemo fato. Persone che riva te dixi? E cossa vienle fare? Barufare o vederne barufare? Credo che le scamparà a la velocità de a luce.
L’indipendensa se avicina? Al buron a se avicina e l’urton finale ghe lo dà ste persone qua….
PS: graxie pal lavoro che te ghe fato comunque e W SAN MARCO, na roba che no te ghe mai scrito in nesun comunicato.
in fede e sensa rancore
Nicola, ai dimisionari no ghe rinprovero le ragioni che i ga prexenta’, ma solo che el momento xera inoportuno parche’ risciava de crear problemi interni nte on momento de notevole cresita. Par mi dimeterse in sto momento xera on ato iresponsabile. Par via del to PS. te ringrasio par aver apresa’ el me laoro, e se te voi sercar WSM sora la me firma, basta che te ve’ vardarte i archivi de forum tipo cuelo de nathion_veneta e cultura_veneta su yahoo groups e te ne cati fin che te voi.
Son in completo accordo con quanto scritto da Nicola e lo sottoscrivo.
L’unica roba che non capisso xe come mai, invesse de usare el sito de VS, se parlemo rento a quelo del PNV?Mah, misteri.