PLEBISCITO.EU | PNV. Press News Veneto

A ghe xe calcosa de stranbo se el primo ministro greco George Papandreou ciama on referendum su l’ultimo pacheto de salvatagio pa’l so paexe. I leader mondiali i se cata a Cannes pa’l G20 par vardar in facia la realta’. L’economia globale a xe drio petar zo, e nisun paexe el ga asunto on ruolo da condotiero par organizar na riscosa. A ghe xe na perdita de controlo, on vodo de potere. La decixion dironpente de Papandreu – deso pararia ritirà – la sinbolegia na eroxion de n’obietivo coletivo. L’economia mondiale la xe ala deriva.

A semo drio movarse da Globalizasion 1.0 a Globalizasion 2.0. Co la Globalizasion 1.0, i paexi i godeva da l’espansion del comercio e dal trasferimento mondiale de tenologia. Dal 1980 al 2010, el comercio mondiale a xe cuadruplicà. On numaro incontabile de milioni de persone i xe sta cavà fora dala povertà; novi ceti medi i xe saltà fora in Axia e in Merica Latina. Co la Globalizasion 2.0, le interconesion economiche fra paexi i xe drio far naser instabilità e rivalità nasionalisteghe.

Na volta i Stati Unii i asumeva automaticamente el ruolo de leader. Da l’inisio ntel 1948, el Piano Marshall el ga da a l’Europa l’ecuivalente de $850 miliardi – na necesità disperà par cronpar magnar, materia prima e machinari – par riscatarse dala seconda guera mondiale. Ntei ani ’80, i Stati Unii i ga ciapà l’inisiativa par sorar la crixi del debito in Merica Latina; nte la fine dei ani ’90, i ga fato la stesa roba par la crixi finansiaria axiatega. L’architetura de l’economia globale del dopo guera la xera in gran parte el prodoto dela leadership mericana.

Ma soto el presidente Obama – probabile che nisuni altri gavaria fato diverso – la capasità e el dexiderio merican de ciapar l’inisiativa se ga stuà. La crixi finansiaria 2008-2009, scominsià ntei Stati Unii, la ga scredità la conpetensa e le idee mericane. L’economia fiapa, l’alto livelo de debito publico e el costante barufar interno i ga ciucià fora la determinasion  politega e la forsa finansiaria par dar na man a staltri. I Stati Unii i ga jutà gran poco pai problemi de debito europei.

L’Europa la raprexenta on cuinto del prodoto mondiale, presapoco gualivo dei Stati Unii. La podeva inpienar sto vodo de leadership; e oviamente, no lo ga fato. Invese, l’Europa la ga agravà sta instabilità globale, sofrendo par via dela propria cresita anemica e del proprio indebitamento. Anca prima che Papandreou silurase tenporaneamente  l’ultimo pacheto de indebitamento – intexo par jutar la Grecia e proteger la Spagna e l’Italia dal default – a ghe xera dubi se xera bastansa grando.

Par proteger l’Italia e la Spagna, el fondo de salvesa europeo (el EFSF, European Financial Stability Facility) el ga de bixogno da 2500 a 3000 miliardi de euri, el ga dito Willem Buiter, chief economist de Citigroup. Sto numaro a xe scuaxi sete volte tanto cuanto ghe xe atualmente ntel EFSF. Da dove vegnarà tutti sti schei? Probabilmente no da l’Europa. Gnanca la Germania la ga bastansa schei par torse tuto sto extra debito.

La Cina la xe na risposta ovia, insiema a altre nasioni axiateghe e esportatori de petrolio co enormi riserve de valuta foresta. (Secondo i ultimi calcoli, le riserve le amontava a $3200 miliardi par la Cina, 516 miliardi par la Rusia e 484 miliardi par l’Arabia Saudita.) I ga on ciaro interese par far si che l’Europa la eviti na totale crixi bancaria e de debito. L’Europa la xe on marcà prinsipale pai loro prodoti.

Ma la Cina la ga rexistio de torse on ruolo pi grando, che no ghe va ben anca a tanti europei. “A xe siocante,” la dixe Martine Aubry, capa del partito socialista francexe, durante on tentativo de tirar su schei cinexi par solevarse dal debito. “I europei, nando dai cinexi, i xe drio far vedar le so debolese. Come farà l’Europa a domandar ala Cina de molarghe de sotovalutar la propria valuta?
Altri i se domanda: Se la Cina la presta schei a l’Europa, come farà l’Europa a criticar la politega umanitaria cinexe? Bele domande.

On mondo de economie senpre pi interconese ga de bixogno de pi cooperasion. Ma dapartuto a ghe xe na framentasion cresente de potere e obietivi. Certo, nesun paexe o grupo de paexi el pol architetar na riscosa globale; l’economica no la xe gnancora (e no la sarà mai) na disiplina cusì potente e precixa. Ma i leaders i pol rimarcar la politega che porta ala riscosa e rifiutar le politeghe che la ritarda. Dimostrando leadership porta a na sicuresa che acelera l’espansion economega. El Piano Marshall el gavea portà sicuresa.

Dopo el falimento dela Lehman Brothers ntel 2008, la cooperasion parea fiorir. I paexi i gavea visto on interese comune de adotar on pacheto de stimoli de taji de tase e de aumento de spexa par prevenir on colaso economico pi profondo. Da alora la marea la se ga invertio.

La debolesa economica la ga costreto paexi a eser pi protetivi. Ntel 2012, l’economia mericana la xera cresua solo del 1.8% e l’area euro (i 17 paexi che dopara l’euro) solo del 0.3%, secondo na stima de l’OCSE. L’alta dixocupasion la tenta leaders poco popolari de far robe riscioxe, no inporta le conseguense internasionali, puntando a mejorar la loro situasion domestica. Sistemi e valori politici diversi i rende la cooperasion pi difisile. Varda par exenpio la Cina.

El pericolo a xe na lenta caduta verso el protesionismo e na guera de valute. I Stati Unii e l’Europa i xe drio bater ritirata par via de masa debito. La Cina e tanti paexi in via de svilupo i punta ala cresita baxà su l’export. Pararia na formula par aumentar el paltan economico.

Robert Samuelson

tólto dal WashingtonPost