El Partito Nasional Veneto el propone la independensa de le Venesie, a partir da el Veneto, doparando on metodo legal, no violento, democratego, portanto i Veneti a poderse esprimere inte on referendum par l'autodeterminasion e la independensa.

In sto sito no demo informasion so coel ca xe el percorso proposto da el pnv, ma demo informasion proprio so coel ca xe, e coel ca no el xe, el pnv. Par informasion so el percorso proposto da el pnv, invitemo a doparar i lighi postà in cao, in particolar el ligo Documenti.

El partito nasional veneto el xe nato co la idea de formar na entità politega in reprexentansa dei Veneti ca vole la independensa. Sensa compromesi e sensa tentenamenti, no el suporta, né el ga suportà, poxision ambigue, puntando drito par el percorso independista convinti i so fondadori ca no ghe xe alternative ala reconstrusion sia de on tesuto social ca moral respetoxo de le nostre convinsion e de le nostre costumanse.

El pnv no el xe però on partito romantico, ca el varda co nostalgia al pasà. Gavemo respeto, orgojo e onore de coel ca xe stà la Serenissima, ca dovemo recordar, la xe la nostra vèra storia; ma semo convinti ca gavemo da vardar vanti par la construsion de on novo rinasimento, na evolusion invese ca na convolusion. E semo determinà a eser construtori de el futuro.

El pnv ospita tuti, basta el respeto dei so principi e de el objetivo, sensa ciapar la parte de na idea politega o filoxofica ma dando spasio a tute le espresion. Donca anca se el pnv el ga on so scopo precixo e semplice, intel pnv xe venjeste de le persone co idee e ideali orientà a el svilupo de valori morali, politeghi e filoxofici, ma sensa cavar polvare dal pasà ma pitosto partendo dal pasà par evolvere inte na nova forma, consona ala evolusion ca tuti nantri gavemo vesto intel tempo.

Tra sti ideologi emerge el conceto de dar rixalto al valor de la Persona, e de la so libartà, ndo el stato el ga da eser lexiero e poco invadente, ndo i citadini i xe soci-paroni de el stato e no suditi; co on delicato equilibrio de libartà e respeto de le costumanse e de la cultura de le Persone ca forma la nasion veneta, in tute le so varianse e sfumadure.